अमेरिकाले नेपालको लोकतन्त्र खत्तम पारेर अधिनायकवाद स्थापना गर्न चाहन्छ : पौडेल

दाङ । राष्ट्रिय जनमोर्चाका उपाध्यक्ष दुर्गा पौडेलले अमेरिकी साम्राज्यवादबाट नेपालको लोकतन्त्रसँगै सार्वभौमिकतामाथि खतरा रहेको बताउनुभएको छ ।

प्रगतिशील पत्रकार संघ नेपाल, दाङले मंगलबार घोराहीमा आयोजना गरेको पत्रकार सम्मेलनमा पौडेलले सो कुरा बताउनुभएको हो ।

राष्ट्रिय जनमोर्चाले सञ्चालन गरेको ‘अमेरिकी साम्राज्यवादविरुद्ध मेची महाकाली अभियान’ को पश्चिमी टोली मंगलबार घोराही पुगेको हो ।

पत्रकार सम्मेलनमा सञ्चारकर्मीका जिज्ञासाको जवाफ दिँदै राजमो प्रवक्ता एवम् पूर्वसांसद पौडेलले विश्वका विभिन्न देशहरूको राष्ट्रियता र सार्वभौमिकतामाथि अमेरिकाले हमला गर्ने गरेको स्मरण गर्नुभयो ।

नेपालमा पनि लोकतन्त्रलाई समाप्त गरेर फासिष्ट शासन कायम गर्ने अमेरिकी प्रयास भइरहेको उहाँले बताउनुभयो । पौडेलले अमेरिकी साम्राज्यवाद सम्पूर्ण विश्वको लागि नै गम्भीर खतरा बनेको स्पष्ट पार्नुभयो ।

‘अहिले नेपालको राष्ट्रियता, सार्वभौमिकता, लोकतन्त्र समेतका लागि गम्भीर खतरा पैदा भएको छ । त्यसका विरूद्ध उच्च सतर्कता अपनाउन राष्ट्रिय जनमोर्चाले सम्पूर्ण नेपाली जनतासित अपील गर्दै देशव्यापी अभियानमा हिँडेको छ’ उहाँले भन्नुभयो, ‘नेपाललाई इण्डोप्यासिफिक रणनीतिअन्तर्गत चीनलाई घेराबन्दी गर्नु र चीनका विरूद्धको युद्धमा नेपाललाई आफ्नो युद्धको अखडा बनाउनु हो ।’

उहाँले अमेरिकी साम्राज्यवादबाट संसारभरि नै युद्धको खतरा रहेको र नेपालमा पनि अमेरिकी साम्राज्यवादको हस्तक्षेप बढेर गएको उल्लेख गर्नुभयो ।

नेपालमा अमेरिकी साम्राज्यवादको प्रत्यक्ष निर्देशनमा चल्ने पार्टी बनाएर संसद र सरकारमा समेत आफ्नो प्रभुत्व कायम गर्न प्रयत्न गर्न थालेको देखिएको उल्लेख गर्दै एमसीसी परियोजना त्यसैको पछिल्लो उपज भएको जिकिर गर्नुभयो ।

राष्ट्रिय जनमोर्चाले अमेरिकी साम्राज्यवादको गम्भीर खतरामाथि ध्यान दिएर मेची–महाकाली अभियान सञ्चालन गरिरहेको जानकारी दिनुभयो ।

फरक प्रशंगमा उहाँले देशमा प्रतिगामी शक्तिहरूले गणतन्त्र र धर्मनिरपेक्षतामाथि लगातार आक्रमण गरिराखेको बताउँदै भारतीय साम्राज्यवादबाट पनि नेपालको राष्ट्रियता, सार्वभौमिकता र अखण्डतामाथि खतरा रहेको बताउनुभयो ।

लोकतान्त्रिक गणतन्त्रको रक्षा गर्दै महंगो संघीयता खारेजी आफूहरुको विगतदेखिकै मुद्दा संस्थागत गर्न नेपाली जनताको साथ चाहिएको बताउनुभयो । उहाँले संघ र स्थानीय सरकार चुस्त बनाउन, अधिकार सम्पन्न मितव्ययी संरचनामा ध्यान दिन सचेत गराउने काम गर्दै आएको बताउनुभयो । उहाँले प्रदेश संरचना खारेजीको माग गर्नुभयो ।

प्रगतिशील पत्रकार संघ जिल्ला सल्लाहकार कृष्णप्रसाद आचार्यको अध्यक्षतामा भएको पत्रकार सम्मेलनमा नेकपा मसालका प्रदेश प्रवक्ता तिलक जिसी, राजमो जिल्ला अध्यक्ष गणेश आचार्य, केन्द्रीय सदस्य सरिता जिसी, अखिल (छैठौं)का अध्यक्ष देवेन्द्र कुवँरलगायतको उपस्थित रहेको थियो । पत्रकार सम्मेलनको सहजीकरण जिल्ला अध्यक्ष महेश रिजालले गर्नुभएको थियो ।

राजमोले जेठ १ गते कञ्चनपुरको महेन्द्रनगर र बाग्लुङको बाग्लुङ बजारबाट एकैसाथ मेची महाकाली अभियान सुरु गरेको हो । यो अभियान जेठ १५ गते काठमाडौं र बुटवलमा समापन गरिने छ ।

मेची-महाकाली अभियानप्रति पत्रकारको जिज्ञासा : जनमोर्चाले अमेरिकाको किन विरोध गरिरहेको छ ?

अमेरिकी साम्राज्यवादले आफूअनुकूल सरकार बनाउन रास्वपालाई अगाडि बढायो : पुरी