धनगढी । राष्ट्रिय जनमोर्चाका महासचिव मनोज भट्टले अमेरिकाले नेपालमार्फत चीन घेर्ने उद्देश्यका साथ नेपालमा हस्तक्षे बढाएको बताउनुभएको छ ।
राजमोले सञ्चालन गरेको ‘अमेरिकी साम्राज्यवाद विरुद्ध मेची महाकाली अभियान’ अन्तर्गत मंगलबार धनगढीमा आयोजित विरोध सभालाई सम्बोधन गर्दै उहाँले यस्तो बताउनुभएको हो ।
महासचिव भट्टले अमेरिकाले एनजिओ र राजनीतिक दलमार्फत नेपालमा घुसपैठ बढाएको आरोप पनि लगाउनुभयो ।
उहाँले नेपाल र नेपालीको भलाइका लागि नभई आफ्नै स्वार्थ पुरा गर्न अमेरिकाले नेपालमा हस्तक्षेप बढाएको पनि स्पष्ट पार्नुभयो ।
‘अमेरिकाले चीन घेर्नका लागि एमसीसीजस्ता विभिन्न परियोजना लागू गर्न खोजेको छ,’ उहाँले भन्नुभयो, ‘आफ्नो उपस्थिति बढाउन एनजिओ र दलमा आफ्नो उपस्थिति बढाएको छ।’
मेची महाकाली कार्यक्रम अन्तर्गत धनगढी हसनपुर पिपल चौतारामा कार्यक्रम सम्पन्न भएको हो ।
कार्यक्रममा अखिल नेपाल युवक संघका अध्यक्ष कृष्ण पाण्ड र अखिल (छैठौं) का प्रदेश सदस्य दिनेश खड्काले पनि सम्बोधन गर्नुभएको थियो ।
कार्यक्रममा राजमो कैलाली उपाध्यक्ष मिलन शाहीले स्वागत गर्नुभएको थियो भने सञ्चालन राजमो कैलालीका सचिवालय सदस्य मेरजन शाहीले गर्नुभएको थियो ।
