गोपालप्रसाद भट्टराई
अर्घाखाँची, ५ कात्तिक।
अर्घाखाँचीमा दशैँको टीका लगाउन ससुराली जाँदै गरेका बाबुछोराको मोटरसाइकल दुर्घटनामा परी मृत्यु भएको छ।
भूमिकास्थान नगरपालिका–८, लम्चीका ६२ वर्षीय देवीराम आचार्य र उहाँका २३ वर्षीय छोरा विवेक आचार्य कात्तिक ४ गते बुधबार मोटरसाइकलमा टीका लगाउन हिँडेका थिए। जिल्ला प्रहरी कार्यालय अर्घाखाँचीका अनुसार उनीहरू सवार लु ६४ प ७४७१ नम्बरको मोटरसाइकल भूमिकास्थान नगरपालिका–२ स्थित ढाकावाङ–सन्धिखर्क सडकखण्डबाट करिब ५० मिटर तल खसेको अवस्थामा बिहीबार बिहान फेला परेको थियो। दुवै जनाको मृत्यु भइसकेको प्रहरीले जनाएको छ।
बाबुछोरा सम्पर्कमा नआएपछि परिवार र आफन्तले खोजी सुरु गरेका थिए। मोबाइलमा फोन गर्दा सम्पर्क हुन नसकेपछि उनीहरूको खोजी गरिएको थियो। सकुशल भेटिने आशामा रहेका आफन्तले अन्ततः दुःखद खबर सुन्नुपरेको छ।
दशैँको टीका लगाएर आफन्तसँग खुसी साट्ने र आशीर्वाद थाप्ने रहर बोकेर निस्किएका बाबुछोराको यात्रा कहिल्यै पूरा नहुने गरी टुङ्गिएको छ। उनीहरूलाई टीका लगाइदिन प्रतीक्षारत आफन्तका लागि यस वर्षको दशैँ असह्य पीडामा परिणत भएको छ।
दुर्घटना कसरी भयो भन्ने विषयमा प्रहरीले थप अनुसन्धान गरिरहेको जनाएको छ। दुर्घटनाको कारण भने पुष्टि भइसकेको छैन।
स्रोतः जिल्ला प्रहरी कार्यालय, अर्घाखाँची।
