काठमाडौँ । शरद् ऋतुमा नेपालका ४४ हिमाल आरोहण गर्न ७६ देशका एक हजार चार सय १० आरोहीले आरोहण अनुमति लिएका छन् । त्यसका लागि एक सय ६१ टोलीले अनुमति लिएका हुन् ।
पर्यटन विभागका शाखा अधिकृत सुधा रेग्मीले ४४ हिमाल आरोहणका लागि एक हजार ६९ पुरुष र तीन सय ४१ महिलाले आरोहण अनुमति लिएको जानकारी दिइन् । आरोहण अनुमति प्रदान गरेबापत विभागले आरोहीबाट रु ३१ करोड ८० लाख ५० हजार ७७८ रोयल्टी सङ्कलन गरेको छ ।
आरोहण अनुमति प्रदान गरेका हिमालमध्ये सबैभन्दा धेरै मनास्लु (८,१६३ मिटर) का रहेका छन् । मनास्लु आरोहणका लागि मात्रै ४३ टोलीका पाँच सय आरोहीले अनुमति लिएका छन्, जसमा तीन सय ७३ पुरुष र एक सय २७ महिला रहेका छन् । उनीहरूबाट विभागले रु २२ करोड ५८ लाख ५७ हजार एक सय ८९ रोयल्टी सङ्कलन गरेको छ ।
धौलागिरि–१ आरोहणका लागि छ टोलीका ३७ जनाले आरोहण अनुमति लिएका छन् । उनीहरूबाट विभागले रु ८४ लाख ७३ हजार छ सय ५० रोयल्टी सङ्कलन गरेको छ । यस्तै, मकालु हिमाल आरोहणका लागि एउटा टोलीका तीन जनाले अनुमति लिएका छन् । उनीहरूबाट विभागले रु छ लाख ८८ हजार ५० राजस्व सङ्कलन गरेको शाखा अधिकृत रेग्मीले बताइन् ।
त्यसैगरी हिम्लुङ हिमालका लागि १२ टोलीका एक सय २१ आरोहीले अनुमति लिएका छन् । उनीहरूबाट विभागले रु ७४ लाख २७ हजार सात सय २० रोयल्टी सङ्कलन गरेको छ । त्यस्तै, आमादब्लम हिमाल आरोहणका लागि ३२ टोलीका तीन सय ८६ जनाले आरोहण अनुमति लिएका छन् । उनीहरूबाट विभागले रु पाँच करोड ७६ लाख ९९ हजार ६५० राजस्व सङ्कलन गरेको छ ।
शाखा अधिकृत रेग्मीका अनुसार पुथा हिउँचुली, डाङ्गा हिउँचुली, बरुणत्से हिमाल, मकालु, गङ्गापूर्णा पश्चिम (लाङचेनेल), थोरोङ पिक, नोर्बु खाङ, अन्नपूर्ण–४, चाम्लाङ, लमजुङ हिमाल, पुमोरी, सारिबुङ, थापा पिक (धाम्पुस), पोखर खाङ, अर्दाङ, जुगल, पेरीलगायतका हिमालका लागि अनुमति प्रदान गरिएको छ ।
आरोहण अनुमति लिनेमा सबैभन्दा धेरै चीनका एक सय ४१ जना रहेका छन् । यसबाहेक रुसका एक सय आठ, फ्रान्सका एक सय ३०, अमेरिकाका एक सय १९, बेलायतका ९६, पोल्यान्डका ४१, नेपालका ३३, स्विट्जरल्यान्डका ४७, स्पेनका ३१, भारतका ४०, इटलीका ४७ र जापानका ३५ जनाले आरोहण अनुमति लिएका शाखा अधिकृत रेग्मीले बताइन् ।
विभागले हिमाल आरोहणका लागि जारी गरेको आरोहण अनुमतिबाट २० लाख ८९ हजार पाँच सय ८४ अमेरिकी डलर अर्थात् रु ३१ करोड ८० लाख ५० हजार रोयल्टी सङ्कलन गरेको छ ।
