बेइजिङ । माओत्सेतुङलाई तानाशाह भनेको टिप्पणीप्रति फुटबल स्टार किलियन एमबाप्पेले माफी मागेका छन् । उनले चिनियाँ जनता र उनीहरूको इतिहासप्रति सम्मान रहेको बताउँदै माफी मागेका हुन् ।
एमबाप्पेले मङ्गलबार वक्तव्य जारी गर्दै आफ्नो टिप्पणी गलत भएको र त्यसले चीन तथा विश्वभरका चिनियाँ समुदायका मानिसको भावनामा चोट पुर्याएको स्वीकार गरे ।
फ्रान्सेली अनलाइन कार्यक्रम ‘द ब्रिज’ मा प्रसारित एउटा भिडियोमा एमबाप्पेले आफ्नो मनपर्ने मिमबारे बोल्दा माओलाई चिनियाँ तानाशाहका रूपमा उल्लेख गरेका थिए ।
उनको टिप्पणीपछि चीनका तीन कम्पनीले व्यावसायिक सम्झौता अन्त्य गर्ने घोषणा गरेका छन् भने चिनियाँ फुटबल सङ्घ र सरकारी सञ्चारमाध्यमले पनि आपत्ति जनाएका छन् ।
पेय पदार्थ उत्पादक डोङपेङ, दुग्ध कम्पनी मेङनियू र चिज उत्पादक मिल्कग्राउन्डले उनीसँगको सम्झौता अन्त्य गरिरहेका छन् ।
चाइना फुटबल एसोसिएसनले स्पेनिस क्लब रियल म्याड्रिड र एमबाप्पे दुवैलाई सार्वजनिक रूपमा माफी माग्न आग्रह गरेको थियो ।
चाइना मिडिया ग्रुपले उहाँ सहभागी खेलको प्रसारण रोक्नुका साथै विज्ञापन हटाएको जनाएको छ । ला लिगाले चिनियाँ समर्थकप्रति खेद व्यक्त गर्दै टिप्पणी एमबाप्पेको व्यक्तिगत धारणा भएको स्पष्ट पारेको छ ।
ला लिगाका अध्यक्ष जेभियर तेबासले चीनसँगको व्यावसायिक साझेदारी जोगाउन चिनियाँ राजदूतसँग छलफल गर्ने बताए ।
चीनको विदेश मन्त्रालयका प्रवक्ता गुओ जियाकुनले चिनियाँ जनताको भावनामा चोट पुर्याउने व्यवहारले व्यापक विरोध सामना गर्नुपर्ने बताए ।
चिनियाँ सामाजिक सञ्जाल रेडनोटले पनि एमबाप्पेसँग सम्बन्धित प्रचार सामग्री हटाउने जनाएको छ । वेइबोमा उनीसँगको साझेदारी अन्त्य गर्न माग गर्दै ह्यासट्याग लोकप्रिय बनेका छन् । केही प्रयोगकर्ताले उनको बहिष्कार गर्नुपर्ने मागसमेत गरेका छन् ।
चीनको विज्ञापनमा नियमित देखिँदै आएका एमबाप्पेको घटनाले विदेशी खेलाडीका सार्वजनिक टिप्पणीले व्यावसायिक सम्बन्धमा पार्न सक्ने प्रभाव देखाएको छ ।
सन् २०१९ मा ह्युस्टन रकेटका तत्कालीन महाप्रबन्धक डेरिल मोरेले हङकङका सरकार विरोधी प्रदर्शनकारीलाई समर्थन गरेपछि चिनियाँ सरकारी टेलिभिजनले एनबिए खेल प्रसारण रोकेको थियो । (रासस/एपी)
