मेची-महाकाली अभियान : पूर्वी टोलीको हरिवन, पश्चिमको कोहलपुरमा विरोध सभा

शनिबार, जेठ ०६, २०८० मा प्रकाशित

काठमाडौं । राष्ट्रिय जनमोर्चाले सञ्चालन गरिरहेको ‘अमेरिकी साम्राज्यवादविरुद्ध मेची–महाकाली अभियान’ अन्तर्गत शनिबार सर्लाहीको हरिवन र बाँकेको कोहलपुरमा विरोध सभा सम्पन्न भएको छ ।

पूर्वी अभियानको टोलीले हरिवनमा गरेको विरोध सभामा राष्ट्रिय जनमोर्चाका सचिव हिमलाल पुरी, रक्तिम सांस्कृतिक अभियानका केन्द्रीय सदस्य दीप गोलेले सम्बोधन गर्नुभएको थियो भने सञ्चालन अखिल (छैठौं) का केन्द्रीय उपाध्यक्ष गणेश आचार्यले गर्नुभएको थियो ।

सो टोलीले यसअघि पर्साको बढनिहारमा पनि कार्यक्रम गरेको थियो । अब पूर्वी टोलीले भोली आइतबार रौतहटमा कार्यक्रम गर्नेछ ।

मेची महाकाली अभियानको पूर्वी टोलीद्वारा पर्साको बढनिहारमा विरोध सभा

यता, पश्चिमी टोलीले शनिबार बाँकेको कोहलपुरमा विरोध सभाको आयोजना गरेको राजमो बाँकेका उपाध्यक्ष जगदीश ढकालले जानकारी दिनुभयो ।

कार्यक्रमलाई राजमो महासचिव मनोज भट्ट, केन्द्रीय सल्लाहकार मोमिना खातुन र अखिल नेपाल किसान महासंघ (अप्फा) का महासचिव तुल्सीराम सापकोटाले सम्बोधन गर्नुभएको थियो । कार्यक्रमको सञ्चालन जातीय समता समाजका केन्द्रीय सदस्य मनबहादुर सुनारले गर्नुभएको थियो ।

यसअघि सो टोलीले आज नेपालगञ्जमा पत्रकार सम्मेलन गरेको थियो । अब भोली पश्चिमी टोलीले विहान सुर्खेतमा पत्रकार सम्मेलन गर्नेछ भने दिउँसो सांस्कृतिक कार्यक्रम गर्नेछ ।

राजमोले अमेरिकी साम्राज्यवादी हस्तक्षेपविरुद्ध यही जेठ १ गते कञ्चनपुर र बागलुङबाट मेची महाकाली अभियान सुरु गरेको हो । अभियान अन्तर्गत विभिन्न जिल्लामा विरोध सभा, सांस्कृतिक कार्यक्रम, पर्चा वितरण, पत्रकार भेटघाट लगायतका कार्यक्रम गरिरहेको छ । अभियानको समापन जेठ १५ गते बुटवल र काठमाडौंमा हुनेछ ।