कलैया । राष्ट्रिय जनमोर्चाका सचिव हिमलाल पुरीले अमेरिकी साम्राज्यवाद नेपालमा आफ्नै पार्टी बनाएर हस्तक्षेपमा उत्रिएको बताउनुभएको छ ।
अमेरिकी साम्राज्यवादको बढ्दो हस्तक्षेपको विरुद्धमा राजमोद्वारा परिचालित पूर्वी टोलीको आयोजनामा २०८० जेठ ५ गते शुक्रबार बाराको एयरपोर्टचोकमा आयोजित कोणसभालाई सम्बोधन गर्दै उहाँले यस्तो अभिव्यक्ति दिनुभएको हो ।
सम्बोधनको क्रममा उहाँले नेपालको इतिहासमा अमेरिकी साम्राज्यवाद अत्यन्तै गम्भीर रूपमा हस्तक्षेपमा उत्रिएको बताउनुभयो ।
‘पहिले पहिले अमेरिकी साम्राज्यवादले नेपाललाई त्यति महत्त्व दिएको थिएन’ उहाँले भन्नुभयो– ‘अहिले अमेरिकी साम्राज्यवादले आफ्नो चीन घेर्ने हिन्दप्रसान्त रणनीति लागु गर्न नेपाललाई महत्त्व दिएर हस्तक्षेप बढाउँदै लगेको छ ।’
सम्बोधनको क्रममा उहाँले अमेरिकी साम्राज्यवाद अब भारतीय साम्राज्यवाद जस्तै माइक्रो म्यानेजमेन्टमा उत्रिएको पनि बताउनुभयो ।
‘अब अमेरिकी साम्राज्यवादले खालि कूटनीतिक रूपमा वा भारतको चस्माले मात्रै नेपालनीति निश्चित गर्दैन’ उहाँको भनाइ थियो– ‘नेपालमाथिको हस्तक्षेप बढाउनका लागि अब अमेरिकाले कथित राष्ट्रिय स्वतन्त्र पार्टी जस्तो आफ्नै नेतृत्वमा चल्ने पार्टी नै गठन गरिसकेको छ ।’
नेता पुरीले कथित रास्वपामार्फत अमेरिकी साम्राज्यवादले नेपालको सरकार र संसद्मा नियन्त्रण गर्न चाहेको बताउनुभयो ।
उहाँले अमेरिकाको यस्तो नयाँ भूमिकाले गर्दा नेपाल चीन विरुद्धको युद्धमैदान बन्ने भएकाले यस विषयमा आम जनतासमेतको ध्यान जानुपर्ने बताउनुभयो ।
मन्तव्य राख्दै नेता पुरीले लोकतन्त्र र धर्म निरपेक्षताको रक्षा तथा सङ्घीयता खारेजीको आवश्यकता, नक्कली भुटानी शरणार्थी प्रकरणलगायतका तात्कालिक राजनीतिक विषयमा पनि पार्टीको धारणा राख्नुभएको थियो ।
अखिल (छैठौं) का उपाध्यक्ष गणेश अधिकारीले सञ्चालन गर्नुभएको उक्त कार्यक्रममा राजमो नेता हरि सापकोटाले पनि मन्तव्य राख्नुभएको थियो ।
जितपुरचोकमा सभा
अभियान टोलीले सोही दिन बाराकै जितपुरचोकमा कोणसभा सम्पन्न गरेको थियो ।
अखिल (छैठौं) का उपाध्यक्ष गणेश अधिकारीको सञ्चालनमा अघि बढेको उक्त कार्यक्रममा राजमो मधेस प्रदेश समितिका अध्यक्ष शेरबहादुर कार्की र प्रदेश समितिकै सचिव बालकृष्ण आचार्यले मन्तव्य राख्नुभएको थियो ।
पर्साको वीरगञ्जमा सभा
अभियान टोलीले त्यसपछिको अघिल्लो कार्यक्रम वीरगन्जको घण्टाघरअगाडि सम्पन्न गरेको थियो ।
केन्द्रीय सचिव हिमलाल पुरीले सम्बोधन गर्नुभएको उक्त कार्यक्रमको सञ्चालन अखिल (छैठौं) का उपाध्यक्ष गणेश अधिकारीले गर्नुभएको थियो ।
कार्यक्रममा अमेरिकी साम्राज्यवादको विरुद्धमा पर्चा वितरण गरिएको थियो ।
टोली आज जेठ ५ गते पर्साको पर्सागढी–३ बढनियारमा बास बसेको छ । भोलि सोही स्थानमा कार्यक्रम गर्ने योजना रहेको टोलीमा सहभागी अखिल (छैठौं) का उपाध्यक्ष गणेश अधिकारीले जानकारी दिनुभयो ।
