नारायणघाट । अखिल नेपाल युवक संघले सञ्चालन गरेको खबरदारी अभियान चितवन पुगेको छ । माघ १५ गते महेन्द्रनगरबाट सुरु भएको ‘भ्रष्टाचार र नागरिकता संशोधन विधेयक विरुद्धको खबरदारी’ अभियान ठाउँ ठाउँमा कार्यक्रम गर्दै बिहीबार चितवन पुगेको हो ।
यसअघि नवलपरासीका विभिन्न स्थानमा स्थानीयले अभियानलाई स्वागत गरेका थिए । बिहीबार विहान नवलपरासीको १६ नं ओमरी र गैँडाकोटस्थित कांग्रेसचोकमा सभा सम्पन्न भएको छ ।
ओमरीमा भएको सभालाई राष्ट्रिय जनमोर्चाका तर्फबाट निर्वाचित वडाअध्यक्ष गणेश ज्ञवाली र संगठनका महासचिव कृष्णराज पाण्डेले सम्बोधन गर्नुभएको थियो भने कांग्रेसचोकमा आयोजित कोणसभालाई संगठनका अध्यक्ष अनिलकिशोर घिमिरे र वडा नं १० का वडा सदस्य कृष्ण सापकोटाले सम्बोधन गर्नुभएको थियो ।
कार्यक्रममा बोल्दै जनप्रतिनिधि सापकोटाले बर्तमान सरकार आफूलाई बामपन्थीको सरकार भनेपनि ब्यवहारमा त्यस्तो महसुस नभएको बताउनुभयो । उहाँले भ्रष्टाचार र बेथिती बढ्दै गएको र युवक संघले सञ्चालन गरेको अभियान अत्यन्त सही भएको बताउनुभयो । सापकोटाले संघीयता र खुकुलो नागरिकता नीतिका कारण देश सिक्किमिकरण हुने खतरा पनि औँल्याउनुभयो । ति ठाउँमा रक्तिम सांस्कृतिक अभियानका कलाकारहरुले जनवादी गीत तथा नृत्य प्रस्तुत गरे ।
अभियान अघि बढ्दै जाँदा यसले ब्यापक जनसमर्थन बटुल्न सफल भएको छ । जनताले युवक संघका कार्यक्रमलाई रुचिपूर्वक हेर्ने गरेको र सहयोग गर्न तयार हुने गरेको संघका उपाध्यक्ष मुकुन्द रोकायले बताउनुभयो ।
‘जनताको ब्यापक समर्थन पाएका छौँ’ उपाध्यक्ष रोकायले युगदर्शनसँग भन्नुभयो, ‘हाम्रो कार्यक्रम हेरिसकेपछि सर्वसाधारणले हामीले के सहयोग गर्नुपर्छ, हामी तयार छौँ भन्ने गरेका छन । यो हाम्रो लागि निकै उत्साहको विषय हो ।’
रोकायका अनुसार जनताको सहयोग र समर्थनका कारण अहिलेसम्म अभियान टोलीका सदस्यहरुले कुनै असहज महसुस गर्नुपरेको छैन । नौ दिनसम्म लगातार अघि बढेको मोटरसाइकल यालीमा सबै ठाउँका स्थानीयले दिएको साथ र सहयोगका कारण थकान महसुुस हुन पाएको छैन ।
तर, भ्रष्टाचार र नागरिकता ऐनको विषयलाई जनस्तरबाट ब्यापक समर्थन भएपनि मिडियाले जति महत्वका साथ कभर गर्नुपर्ने थियो, त्यो नभएको रोकायले बताउनुभयो । ‘मिडियाले हाम्रा कुरा ब्यापक रुपमा उठाइदिए सबैतिर अभियानबारे जानकारी हुन्थ्यो र अझ प्रभावकारी बन्नेथियो ।’ उपाध्यक्ष रोकायले भन्नुभयो ।
अभियान अन्तर्गत आज नाराणघाटस्थित पुल्चोकमा कार्यक्रम गर्दै टोली अघि बढ्नेछ भने साँझ बास टाँडीमा हुनेछ । खबरदारी अभियानको टोली माघ २९ गते काँकडभिट्टा पुग्ने कार्यक्रम छ ।
यो पनि पढ्नुहोस्ः
युवक संघको अभियानले नयाँ पिंढीलाई पार्टीमा आकर्षित गर्छः महामन्त्री सिंह
नेपालमा समृद्धीको बाधक भ्रष्टाचार: अध्यक्ष घिमिरे
युवक संघकाे खबरदारी अभियानलाई मसालकाे अभिनन्दन
युवक संघको खबरदारी अभियानः भ्रष्टाचारीको काम्दैछ मुटु
खबरदारी अभियानः जनतालाई प्रत्यक्ष छोएको ‘भ्रष्टाचार र नागरिकता’
कपिलवस्तु पुग्यो खबरदारी अभियान, बौद्धिक वर्गको ध्यान खिच्न सफल
युवक संघको खबरदारी अभियानलाई ठाउँ-ठाउँमा भब्य स्वागत
मनोज भट्टको प्रश्नः कालापानी नक्सामा समेटेर भारतले युद्धको घोषणा गरेको हो?
युवक संघको ‘मेची-महाकाली खबरदारी अभियान’ बुधबार सुरु हुँदै
‘मेची-महाकाली खवरदारी अभियान’ को रुट सार्वजनिक
