काठमाडाैं । नेपाल कम्युनिस्ट पार्टी (मसाल) ले अखिल नेपाल युवक संघले सञ्चालन गरेकाे भ्रष्टाचार र नागरिकता संशाेधन विधेयक विरुद्धकाे खबरदारी अभियानलाई स्वागत गरेकाे छ । मंगलबार महामन्त्री माेहनविक्रम सिंहले वक्तव्य प्रकासित गरी युवाहरुकाे कदमलाई अभिनन्दन गर्नुभएकाे हाे ।
युवक संघको उक्त कार्यक्रममा जनताको व्यापक समर्थन प्राप्त भएको उल्लेख गर्दै महामन्त्री सिंहले त्यसले देशमा सरकारको राष्ट्रघाती नागरिकता नीति र भ्रष्टाचार समेतका विरुद्ध जनतामा व्यापक असन्तोष र जनमत भएको स्पष्ट पारेकाे बताउनुभएकाे छ । मसालले ति विषयहरूमा आन्दोलनलाई अरू उच्च र व्यापक रूपमा अगाडि बढाउनुपर्ने आवश्यकता जाेड दिएकाे छ ।
यस्ताे छ महामन्त्री सिंहकाे वक्तव्य
सरकारले अपनाएको उदार र राष्ट्रघाती नागरिकतासम्बन्धी नीतिका कारणले देशको राष्ट्रियतामा नै गम्भीर आँच पुगिरहेको छ । त्यसले गर्दा ठूलो सङ्ख्यामा विदेशी, खास गरी भारतीयहरू नेपालको नागरिक बन्दै जाने र त्यसरी देशमा नेपालीभन्दा विदेशीहरू बहुसङ्ख्यक बन्दै जाने स्थितिको सृजना हुँदै गइरहेको छ । त्यसको परिणाम स्वरूप नेपाल सिक्किम बन्ने गम्भीर खतरा समेत बढ्दै गइरहेको छ । त्यो अवस्थामा त्यसप्रकारको उदार र राष्ट्रघाती नागरिकतासम्बन्धी नीतिका विरुद्ध संघर्ष राष्ट्रिय आवश्यकता भएको छ । त्यसै गरेर देशमा बढ्दै गइरहेको भ्रष्टचार पनि एउटा गम्भीर समस्या भएको छ र त्यसका विरुद्ध पनि व्यापक राष्ट्रिय संघर्षको आवश्यकता छ ।
उक्त दुवै विषयहरूलाई लिएर अखिल नेपाल युवक संघले महेन्द्रनगरदेखि झापासम्म मोटरसाइकल मार्चको कार्यक्रम बनाएको छ । त्यस सिलसिलामा अहिलेसम्म देशका कैयौँ भागहरूमा सभा सहित विभिन्न कार्यक्रमहरू सम्पन्न गर्दै त्यो मार्च बुटवल आइपुगेको छ र बुटवलमा पनि कैयौँ कार्यक्रमहरू सम्पन्न भएका छन् । भोलीदेखि त्यो कार्यक्रम पूर्वतिर बढ्ने छ ।
युवक संघको उक्त कार्यक्रममा जनताको व्यापक समर्थन प्राप्त भएको छ । त्यसले देशमा सरकारको राष्ट्रघाती नागरिकता नीति र भ्रष्टाचार समेतका विरुद्ध जनतामा व्यापक असन्तोष र जनमत भएको कुरालाई बताउँछ । वास्तवमा उक्त विषयहरूमा आन्दोलनलाई अरू उच्च र व्यापक रूपमा अगाडि बढाउनुपर्ने आवश्यकता छ ।
वास्तवमा आज देश गम्भीर संकटको मुखबाट गुज्रीरहेको छ । गणतन्त्र, राष्ट्रिय र धर्मनिरपेक्षता विरुद्ध विभिन्न देशी वा विदेशी प्रतिगामी शक्तिहरूले चौतर्फी रूपमा हमला गरिरहेका छन् । त्यसका साथै संघीयता पनि देशका लागि एउटा गम्भीर खतरा बनेको छ । मजदुर, किसान, महिला, जनजाति, दलित आदिका समस्याहरू पनि गम्भीर बन्दै गइरहेका छन् र उनीहरू देशव्यापी रूपमा नै पीडित हुनु परिरहेको छ । विकास कुण्ठित हुँदै गइरहेको छ । उक्त सबै विषयहरूमा जनतालाई व्यापक रूपमा जागृत, संगठित र आन्दोलित गर्नुपर्ने आवश्यकता छ । ने.क.पा. (मसाल)ले उक्त सबै विषयहरूमा आन्दोलन संगठित गर्ने नीति अपनाएको छ र विभिन्न बैधानिक मोर्चा वा जनवर्गीय संगठनहरूले त्यो आन्दोलनलाई अगाडि बढाउन संगठित र योजनावद्ध प्रकारले पहलकदमी गरिरहेका छन् ।
अन्तमा युवक संघको मार्चलाई अभिनन्दन गर्दै त्यसको भव्य सफलताको कामना गर्दछौँ ।
