भद्रपुर । हात्तीबाट पाकेको धानबाली जोगाउन झापाको बाहुनडाँगीमा सातओटा साइरनजडित ट्र्याक्टर परिचालन गरिएको छ ।
भारतबाट दैनिक ५०–६० को सङ्ख्यामा नेपाल प्रवेश गर्ने हात्तीलाई धपाउन सीमानाकामा साँझ परेदेखि उज्यालो नभएसम्मका लागि साइरनसहितको ट्र्याक्टर परिचालन गरिएको हो ।
मेचीनगर नगरपालिका–४ बाहुनडाँगीका सीमाक्षेत्रको आलडाँगी, भोर्लेनी, बाहुनडाँगी भन्सार नाका, मिलनचोक, पुरानो नकलबन्द जाने बाटो, राइसिङ पुल र माताचोकमा एक एकओटाका दरले ट्र्याक्टर राखिएको वडाध्यक्ष अर्जुन कार्कीले बताउनुभयो ।
विगत सात वर्षअघि प्रकृति संरक्षण कोषमार्फत गरिएको बिद्युतीय तारबार भत्काएर हात्ती गाउँ पस्न थालेपछि गाउँवासी र अन्नबालीको सुरक्षाका लागि साइरनजडित ट्र्याक्टर परिचालन गरिएको अध्यक्ष कार्कीको भनाइ छ ।
विद्युतीय तारबार मर्मत सम्भारको अभावमा काम नलाग्ने अवस्थामा पुगेको बताउँदै कार्की भन्नुहुन्छ– ‘हुल बाँधेर आएका हात्ती साइरन बज्न थालेपछि तितरबितर भएर भारततर्फ फर्किन्छन् । दिगो समाधान होइन, तत्कालका लागि बाली जोगाउने वैकल्पिक उपाय भएको छ ।’
साइरन बजेपछि हात्ती आएको थाहा पाएर गाउँले पनि सचेत रहने गरेको उहाँको भनाइ छ । निर्वाचनमा क्षेत्र नम्बर १ का सबै राजनीतिक दलको एजेन्डा हात्ती समस्या समाधान गर्ने भनिए पनि जितेर गएपछि बेवास्ता गरेको स्थानीयवासीको भनाइ छ ।
जिल्लाको भद्रपुर, कचनकवल, बिर्तामोड, बुद्धशान्ति, दमकलगायतका क्षेत्रमा हात्तीको उत्तिकै त्रास रहेको छ । (रासस)
