काठमाडौँ । मिलेनियम च्यालेन्ज कर्पोरेसन (एम.सी.सी.) अन्तर्गत ३१५ किमि विद्युत् प्रसारण लाइनको ठेक्का आह्वान गरिएको छ ।
एम.सी.सी. को नेपाल शाखा मिलेनियम च्यालेन्ज एकाउन्ट नेपाल (एम.सी.ए.) ले आज २०७९ मङ्सिर १३ गते सोमबार विद्युत् प्रसारणलाइन निर्माणको ठेक्का आह्वान गर्दै आयोजनाको काम अघि बढाएको हो ।
एम.सी.ए. ले प्रसारण लाइन निर्माणका लागि तीन चरणको ठेक्का आह्वान गरेको छ । पहिलो चरणमा लप्सिफेदी–रातामाटे–हेटौँडा ४०० केभी (१७७ किमि) प्रसारणलाइन निर्माणको ठेक्का आह्वान गरिएको छ ।
त्यस्तै, दोस्रो चरणमा रातामाटे–दमौली ४०० केभी (९० किमि) र तेस्रो चरणमा दमौली–बुटवल ४०० केभी (१०८ किमि) को प्रसारण लाइन निर्माणको ठेक्का आह्वान गरिएको छ । आयोजनाले कुल ३१५ किमि प्रसारण लाइन निर्माण गर्ने छ ।
सोमबार आह्वान भएको ठेक्कामा यही वर्षको अन्त्यसम्म अर्थात् चैत २९ गतेसम्ममा आवेदन दिनुपर्ने एम.सी.ए. नेपालको कार्यालयले जनाएको छ । ठेक्का पाउने कम्पनीले आयोजनाको डिजाइन, सप्लाई, डेलिभरी, इन्सटलेसन, टेस्टिङ र कमिनसिङ गर्नुपर्ने एम.सी.ए. नेपालको कार्यालयले जनाएको छ ।
आगामी पाँच वर्षमा निर्माण सक्नुपर्ने आयोजनाको रूपमा रहेको यो प्रसारण लाइनको निर्माण सन् २०२८ मा सम्पन्न गर्नुपर्ने बताइएको छ । आयोजनामा कुल ८८६ ओटा टावर निर्माण हुने छन् भने यसका लागि करिब २ लाख १२ हजारओटा रुख काट्नुपर्ने छ । यो आयोजना अन्तर्गतको प्रसारण लाइन काठमाडौँ, सिन्धुपाल्चोक, नुवाकोट, धादिङ, मकवानपुर, चितवन, तनहुँ, पाल्पा, नवलपुर र परासी हुँदै भारततर्फ जाने छ ।
४०० केभी डबल सर्किटको प्रसारण लाइनले ३००० मेगावाटसम्म विद्युत् प्रवाह गर्न सक्ने छ । यो प्रसारण लाइन निर्माण सम्पन्न भएपछि भारततर्फ विद्युत् व्यापारका लागि नेपालको दोस्रो प्रसारण लाइन हुनेछ । यसका लागि ११४ मिलियन अमेरिकी डलर खर्च लाग्ने एम.सी.ए. नेपालको आँकलन छ ।
