काठमाडौं । काठमाडौँ महानगरपालिकाले १ हजार २६ वटा स्मार्ट स्ट्रीट लाइट जडान गरेको छ। महानगरले पुरानासँगै नयाँ पोल राखेर बत्ती जडान गरेको हो।

महानगरका अनुसार पुराना पोलमा केही बत्ती राख्दा प्रकाश नपुग्ने ठाउँमा नयाँ पोल राखिएको छ। नयाँ १७७ वटा पोल प्रयोग भएका छन्।

महानगरले महाराजगञ्ज– लैनचौर– जमल खण्डमा ३१८ वटा जडान गरेको छ।

महाराजगञ्जको प्रहरी तालिम केन्द्र– बालुवाटार–नक्साल हुँदै माइती घर मण्डलासम्म ३६३ वटा, कमलपोखरीदेखि गौशालासम्म १८१ वटा, त्रिपुरेश्वर–थापाथली–माइतीघर मण्डलासम्म ७६ वटा, चावहिल– बौद्ध सडक खण्डमा ९९ वटा बत्ती जडान गरिएका हुन्।

महानगरपालिकाका इलेक्ट्रिकल इन्जिनियर पदमराज पौडेलका अनुसार स्थलगत आवश्यकताका आधारमा केही संख्या कम भएको छ। पौडेलका अनुसार फराकिलो सडकमा १२० वाट र साँघुरो सडकमा ९० वाटका बत्ती जडान भएका छन्।