काठमाडौं । नेपाली सेनाको सैनिक कल्याणकारी कोषमा ८२ अर्ब ६६ करोड १२ लाख रुपैयाँ बराबरको सम्पत्ति रहेको सेनाले जनाएको छ ।
आइतबार उपप्रधानमन्त्री तथा रक्षामन्त्री पूर्णबहादुर खड्कालाई सैनिक कल्याणकारी कोष मातहत सञ्चालित गतिविधिहरू जानकारी दिनेक्रममा प्रधानसेनापति प्रभुराम शर्माले सो जानकारी दिएका हुन् ।
कोषको मुलधनमा पुस मसान्तसम्म रु ७५ अर्ब ९० करोड ५७ लाख ४९ हजार नगद मौज्दात रहेको छ। विभिन्न कार्यक्रमहरुमा रु ६ अर्ब ७५ करोड ५५ लाख लगानी समेत कोषको यथार्थ सम्पत्ति रु ८२ अर्ब ६६ करोड १२ लाख रहेको छ।
नेपाली सेनाका अनुसार सैनिक कल्याणकारी निर्देशनालय मातहत संचालित शिक्षण संस्थाहरु, स्वास्थ्य उपचार सुबिधा एवं अन्य गतिविधिहरुबाट ३ हजारभन्दा बढीले प्रत्यक्ष रोजगारी पाएका छन्। यस्तै वार्षिक १ अर्ब २५ करोड भन्दा बढी रकम मुलुकको राजश्वमा प्रत्यक्ष योगदान भइरहेको छ।
वि.सं.२०३२ सालमा स्थापना भई सञ्चालनमा रहेको गैर नाफामुलक सैनिक कल्याणकारी कोष र सो मातहत सञ्चालित विविध गतिविधिहरूका बारेमा जानकारी गराइएको हो।
जङ्गी अड्डा परिसरमा आयोजित कार्यक्रममा प्रधान सेनापति शर्माले ‘बहुजन हिताय, बहुजन सुखाय’ मूलमन्त्रसहित हिताधिकारीहरूको जीवनयापनमा सहयोग पुर्याउन सैनिक कल्याणकारी कोष मातहत सञ्चालित गतिविधिहरु पारदर्शी एवं नियमसंगत रहेको बताए ।
उनले हिताधिकारीहरूको कल्याणमा प्रभावकारी ढंगले सेवा सुबिधाको विस्तार गर्न कोष प्रयत्नशील रहेको पनि दाबी गरे ।
नेपाली सेनाका बहालवाला एवं अवकास प्राप्त सकलदर्जा तथा तिनका आश्रित परिवारजनको हितका लागि शिक्षा, स्वास्थ्य, सीप तथा स्वरोजगार र सुबिधा तथा सहुलियत उपलव्ध गराई जीवनयापनमा सहयोग पुर्याउने उद्देश्यले संचालित कल्याणकारी गतिविधिहरुबाट सर्वसाधारण पनि लाभान्वित हुँदै आई रहेको नेपाली सेनाले जनाएको छ।
