काठमाडौं । दक्षिण कोरिया जाने युवाको भाषा परीक्षा आगामी माघ ६ गते (जनवरी २०) देखि हुने भएको छ ।
परीक्षाको लागि एक लाख ६४ हजारले आवेदन दिएका छन् । आवेदक सबै परीक्षामा सामेल हुन पाउने छन् ।
पानी जहाज निर्माण क्षेत्रमा सहभागी भएका र उत्पादनमुलक क्षेत्रका लागि पनि आवेदन दिएकाहरूले भाषा परीक्षामा सहभागी हुन पाउने ईपीएस शाखाले जनाएको छ ।
आवेदकहरूलाई तीन चरणमा भाषा परीक्षामा सहभागी गराइने भएको छ। पहिलो चरणमा ४७ हजारले परीक्षा दिन पाउने भएका छन्। दोस्रो चरणमा ८० हजारलाई सहभागी गराइने र बाँकीलाई तेस्रो चरणको भाषा परीक्षामा सहभागी गराइने भएको छ।
पहिलो चरणमा परीक्षा दिइसकेकाहरूको नतिजा सार्वजनिक भएपछि दोस्रो चरणको परीक्षा सञ्चालन हुनेछ। त्यसपछि मात्रै अन्तिम चरणको परीक्षा हुनेछ।
यसअघि पानी जहाज निर्माण क्षेत्रको परीक्षामा सहभागी भएकाहरुलाई उत्पादनमुलक क्षेत्रमा पनि सहभागी गराउन उच्च अदालत पाटनले आदेश दिएको थियो।
तर ईपीएस प्रणालिमा एक क्षेत्रको परीक्षामा सहभागी भएकाहरुले अर्को क्षेत्रको परीक्षामा त्यही वर्ष सहभागी हुन नपाउने व्यवस्था छ।
५ सिफ्टमा दैनिक एक हजार जनाका दरले परीक्षा सञ्चालन हुने छ। परीक्षा शनिबार र आइतबार पनि सञ्चालन गर्ने तालिका कोरियाले उपलब्ध गराएको छ। दैनिक एक हजार जनाले मात्रै परीक्षा दिनसक्ने क्षमता रहेकाले उपकरण थप नभएमा साढे ५ महिना परीक्षा सञ्चालन गर्न लाग्ने छ।
आकर्षक गन्तव्य कोरियाको रोजगारीबाट बञ्चित हुन लागेको भन्दै पानीजहाज निर्माण क्षेत्रमा सहभागी भएकाहरूले आन्दोलन नै गरेका थिए। त्यसक्रममा दुई जनाको ज्यान गएको थियो ।
दक्षिण कोरियाले ईपीएस प्रणालीमार्फत १६ देशबाट श्रमिक लैजान्छ। तीमध्ये सबैभन्दा बढी नेपाली जान थालेका छन्।
