पाटन । अर्थमन्त्री डा प्रकाशशरण महतले अर्थतन्त्रका सूचकमा सुधार हुँदै गएको जानकारी गराउनुभएको छ ।
नेपाल ट्रेड युनियन काङ्ग्रेसद्वारा २०८० मङ्सिर २८ गते बिहीबार ललितपुरमा आयोजित ‘औद्योगिक नीति तथा श्रम सम्बन्ध’ विषयक कार्यक्रममा उहाँले पर्यटकको वृद्धि हुँदै गएको, बैङ्क तथा वित्तीय संस्थाको ब्याजदर घट्दै गएको, रेमिट्यान्स बढ्दै गएको जानकारी गराउँदै अहिले अर्थतन्त्रका सबै सूचकमा सुधार हुँदै गएको दाबी गर्नुभयो ।
‘अहिले अर्थतन्त्रका सूचकमा सुधार हुँदै गएको छ; पर्यटकको वृद्धि हुँदै गएको छ; ब्याजदर घट्दै छ; रेमिट्यान्स पनि बढ्दै छ । हामीले छलफल गरेर मौद्रिक नीतिमा पनि केही लचिलो बनाउन प्रयत्न गरेका छौँ । विस्तारै उद्योग–व्यवसाय पनि सबल बन्दै जाने छ; श्रमिकको माग पनि वृद्धि हुँदै जाने छ; श्रमिकहरू विस्थापित हुने अवस्था अन्त्य हुनेछ’ अर्थमन्त्री महतले भन्नुभयो– ‘नेपालको अर्थतन्त्र समस्यामा थियो, अहिले हामी हटाउन लागेका छौँ ।”
डा. महतले बाहिरबाट आयात हुने सामानको तुलनामा नेपालमा उत्पादन हुने ओैद्योगिक सामानको लागत कम गर्न नसकिएको उल्लेख गर्दै सक्रिय श्रमिकको क्षमतालाई प्रोत्साहन गर्न पनि नसकिएको धारणा राख्नुभयो ।
उहाँले उत्पादकत्व कम हुँदा समयसापेक्ष श्रमिकको पारिश्रमिक बढ्न नसकेको धारणा व्यक्त गर्नुभयो ।
‘उत्पादकत्व बढाउने हाम्रो चुनौती छ । यसका लागि पूर्वाधारको विकास आवश्यक छ’ उहाँले भन्नुभयो ।
उहाँले सरकारको प्राथमिकता पूर्वाधार विकासमा रहेको बताउनुभयो ।
