भक्तपुर । भक्तपुरको सल्लाघारीमा दसैँका लागि ल्याइएका च्याङग्रा, भेडा, बोका, खसी बिक्री कम भएपछि व्यपारीले मूल्य घटाएका छन् ।
दसैँका लागि मात्रै बजार लाग्ने भक्तपुरको सल्लाघारीस्थित नेपाल ट्रस्टको नाममा रहेको ९९ रोपनी चौरमा भक्तपुर, काठमाडौँं, काभ्रेपलाञ्चोकदेखिका उपभोक्ताको भिड लागे पनि अपेक्षित रूपमा बिक्री कम भएपछि व्यापारीले कात्तिक ८ गते बुधबारबाट मूल्य घटाएका हुन् ।
दसैँको लागि मुस्ताङ हुदैँ ल्याइएको च्याङ्ग्रा बुधबारबाट किलोमा रु दुई सय ५० घटाएको उहाँले बताउनुभयो । यहाँका सबै व्यापारीको सल्लाहअनुसार नै च्याङ्ग्राको मूल्य घटाएर प्रतिकिलो एक हजार १०० मा बिक्री गरेको व्यापारी खड्काले बताउनुभयो ।
बझाङबाट ल्याइएको नेपाली च्याङ्ग्रा प्रतिकिलो रु ९०० मा बिक्री भइरहेको र चिनियाँ च्याङ्ग्रा प्रतिकिलो रु एक हजार १०० मा बिक्री भइरहेको जानकारी उहाँले दिनुभयो ।
अर्का च्याङ्ग्रा व्यापारी उत्तम खड्गीले मुस्ताङमै च्याङ्ग्रा महङ्गो तिर्नुपरेकाले यस वर्ष मूल्य बढेको भए पनि आजबाट मूल्य घटाएको बताउनुभयो ।
उहाँले भन्नुभयो– ‘चीनबाट ल्याइएको च्याङ्ग्रा नेपाली व्यापारीले मुस्ताङबाट खरिद गर्दा किलोमा नभई प्रतिगोटा रु ३५ हजारदेखि ४० हजारसम्म तिर्नुपरेकाले यस वर्ष च्याङ्ग्रा महङ्गो भएको हो ।”
अर्का व्यापारी रमेश खड्काले च्याङ्ग्राको मूल्य घटेको र भेडा पनि मूल्य घटाएर प्रतिकिलो रु ६५० मा बिक्री गरेको बताउनुभयो ।
त्यस्तै, अर्का च्याङ्ग्रा व्यापारी कुलबहादुर श्रेष्ठले पशु स्वास्थ्य चिकित्सकबाट भेडा च्याङ्ग्राको परीक्षण गरेर ल्याएको बताउनुभयो ।
च्याङ्ग्रा तयारी मासुको मूल्य पनि घटेको छ । सल्लाघारीको चौरमा तयारी च्याङ्ग्राको मासु प्रतिकिलो दुई हजार ८०० मा व्यापारीले बिक्री गर्दै आए पनि बुधबारबाट दुई हजार ५०० मा बिक्री गर्न थालेको व्यापारीले बताएका छन् ।
उता, सल्लाघारीमा खसीको मूल्य पनि घटेको छ । व्यापारीहरूले खसी आजबाट प्रतिकिलो रु ६०० मा बिक्री गर्न थालेका छन् ।
यस वर्ष यहाँ करिब दुई हजार खसी, दुई हजार भेडा, च्याङ्ग्रा ल्याइएको व्यापारीले बताएका छन । (रासस)
