काठमाडौँ । राष्ट्रिय करदिवस साताव्यापी रूपमा मनाइने भएको छ । आन्तरिक राजस्व विभागले २०७९ मङ्सिर १ गतेदेखि एक हप्तासम्म विभिन्न कार्यक्रम गरेर करदिवस मनाउन लागेको हो ।
विभागका महानिर्देशक रितेशकुमार शाक्यले राष्ट्रिय करदिवसका अवसरमा हरेक करदाता कार्यालयले प्रथम करदातालाई सम्मान गर्ने, उद्योगी–व्यवसायीलगायत करदाताका छाता सङ्गठनसँग विभिन्न छलफल तथा अन्तरक्रियालगायत विभिन्न कार्यक्रम गर्न लागिएको बताउनुभयो ।
यस वर्षको कर दिवसको नारा “स्वेच्छिक सहभागितासहितको फराकिलो कराधार : दिगो र उत्पादनमुखी अर्थतन्त्रको आधार” रहेको छ ।
करदाता आफैले स्वेच्छिक रूपमा कर तिर्न अभिप्रेरित गर्ने र करभुक्तानी प्रणालीलाई प्रविधिमैत्री बनाउने गरी विभागले काम गरिरहेको महानिर्देशक शाक्यले बताउनुभयो ।
‘कर तिर्ने प्रक्रियालाई प्रविधिमैत्री बनाउने र दर्तादेखि अन्तिमसम्मको काममा करदाता भौतिक रूपमा उपस्थित हुन नपर्ने अवस्था बनाउन काम काम गरिरहेका छौंँ’ उहाँले भन्नुभयो ।
करभुक्तानी प्रणाली सुधारका लागि विभागले अन्तर्राष्ट्रिय मुद्रा कोषको सहयोगमा “ट्याक्स एड्मिनिस्ट्रेसन डायग्नोस्टिक एसेस्मेन्ट टुल” (टाडाट) र जर्मन सहयोग नियोगको सहयोगमा बिजनेस प्रोसेस इञ्जिनियरिङ (बिपिआर) गरिरहेको छ ।
‘कर प्रणालीको आधुनिकीकरण र सुधारका लागि काम भइरहेको छ । करदाताले पेस गर्नुपर्ने विवरणको अनुसूची परिवर्तन गरेको छौँ । त्यसले गर्दा करछली कम हुने हाम्रो अनुमान छ’ महानिर्देशक शाक्यले भन्नुभयो ।
विभागअन्तर्गत ठुला करदाता कार्यालय, मध्यमस्तरीय करदाता कार्यालय, ४३ ओटा आन्तरिक राजस्व कार्यालय र ३९ ओटा करदाता कार्यालयसमेत गरी जम्मा ८४ ओटा कार्यालय छन् । (रासस)
