काठमाडौँ । सरकारले वैदेशिक मुद्राको सञ्चिति जोगाउन सवारी साधनको आयातमा लगाएको प्रतिबन्धका कारण केही सोरुम बन्द भएका छन् ।
सरकारले विद्युतीय सवारी साधनको आयातमा रोक नलगाएको भए पनि डिजेल तथा पेट्रोलबाट चल्ने चारपाङ्ग्रे गाडी आयातमा प्रतिबन्ध लगाइएको छ ।
देशमा विदेशी मुद्राको सञ्चितिमा कमी भएको भन्दै सरकारले गत वैशाखयता निजी प्रयोजनमा हुने कार, भ्यान तथा जिप आयातमा रोक लगाएको छ । लामो समयदेखि आयात रोकिएका देशभर सञ्चालित गाडीका अधिकांश डिलर बन्द हुन थालेको नाडा अटोमोबाइल्स एसोसिएसन अफ नेपाल (नाडा) ले जनाएकोे छ ।
गत साउनसम्मको विवरणानुसार यस क्षेत्रमा बैङ्क तथा वित्तीय संस्थाको झन्डै रु ९५ अर्ब लगानी भएको छ । बैङ्क तथा वित्तीय संस्थाको ब्याजमा भएको वृद्धि तथा आयातमा भएको प्रतिबन्धका कारण व्यवसायी मारमा परेको बताइएको छ ।
नाडाको पछिल्लो तथ्याङ्कानुसार आयातमा लगाइएको प्रतिबन्धका कारण ५८ डिलर बन्द भएका छन् । यस्तै, थप एक सयसम्म सोरुम बन्द हुने क्रममा पुगेका छन्† जसमा प्रदेश नं. १ मा नौ, मधेस प्रदेशमा ११, बागमती प्रदेशमा १८, गण्डकी प्रदेशमा सात, लुम्बिनी प्रदेशमा तीन, कर्णाली प्रदेशमा सात र सुदूर पश्चिम प्रदेशमा तीनओटा सोरुम बन्द भएका हुन् ।
नाडाका अनुसार हाल नेपालमा एक हजार २५ ओटा सवारी साधन बिक्री गर्ने सोरुम छन्† जसमा प्रदेश नं. १ मा एक सय ४५, मधेस प्रदेशमा ९५, बागमती प्रदेशमा तीन सय ७८, गण्डकी प्रदेशमा एक सय ८२, लुम्बिनी प्रदेशमा एक सय पाँच, कर्णाली प्रदेशमा ६२ र सुदूर पश्चिम प्रदेशमा ५८ ओटा सोरुम छन् ।
उद्योग, वाणिज्य तथा आपूर्ति मन्त्रालयले गत वैशाख १३ गते देशमा विदेशी मुद्रा सञ्चितिमा कमी आएको भन्दै राजपत्रमा सूचना प्रकाशन गर्दै विभिन्न दसओटा वस्तु आयातमा प्रतिबन्ध लगाएको थियो । पछिल्लो समय सरकारले उक्त वस्तुको आयात प्रतिबन्धलाई निरन्तरता दिँदै आगामी मङ्सिर मसान्तसम्मका लागि निरन्तरता दिएको छ ।
अन्य वस्तुको प्रतिबन्धलाई खुलाए पनि सरकारले सबै प्रकारका तयारी मदिरा (औद्योगिक कच्चापदार्थ), तीन सय अमेरिकी डलरभन्दा बढी मूल्यका स्मार्टफोन, एम्बुलेन्स र शवबाहनबाहेक जिप, कार र भ्यान एवं एक सय ५० सिसीभन्दा माथिका मोटरसाइकलको आयात मङ्सिर मसान्तसम्म रोकेको छ । (रासस)
