नेपालगञ्ज । हवाइ उडान नहुँदा कर्णाली र सुदूर पश्चिम बासिन्दाहरू समस्यामा परेका छन् । खासगरी नेपालगञ्जबाछ कर्णालीका विभिन्न जिल्ला जानेहरू समस्यामा परेका हुने ।
उडानको अभावमा दुर्गम जिल्ला जाने यात्रुले बडादसैँ, तिहार र छठ पर्वमा घर जान सकेका छैनन् । उनीहरू नेपालगञ्जमै अलपत्र परेका छन् ।
हुम्लाको सिमिकोटका लागि एक मात्र यातायातको साधन हवाइयात्रा रहेकाले निजी कम्पनीले काठमाडाँैमै उडान केन्द्रित गरेपछि यात्रु नेपालगञ्जमै थन्किएका छन् । हाल नेपालगञ्जबाट कर्णालीका हिमाली जिल्लामा उडान भर्न समिट एयरको एक मात्र जहाज छ । समिट एयरको जहाज पर्खिरहेका यात्रु निराश अवस्थामा विमानस्थलमा भेटिन्छन् ।
हुम्लाका लागि टिकट लिन विमानस्थल पुगेका कोही पनि उड्न पाएका छैनन् । विमान कम्पनीका कर्मचारी टिकट पहिलानै प्याक भइसकेको जवाफ दिँदै आएका छन् ।
निजी विमान कम्पनीसहित सरकारी कम्पनी नेपाल एयरलाइन्सको विमान पनि नेपालगञ्जमा उपलब्ध छैन । नेपाल एयरलाइन्सको विमानस्थलस्थित काउन्टर बन्द छ । सर्वसाधारण निराश भएर फर्किनु परिरहेको छ । निजी तारा एअरको जहाज काठमाडौँमा रहेकाले झनै सास्ती ब्यहोर्नु परिरहेको यात्रुहरू बताउँछन् ।
बैतडीको हवाइसेवा सञ्चालन भएन
बडादसैँमा पनि सुदूरपश्चिम प्रदेशको पहाडी जिल्ला बैतडीमा हवाई सेवा सञ्चालन हुन सकेन । लामो समयदेखि बन्द रहेको हवाई सेवा दसैँमा पुनः सञ्चालन हुने भनिएको थियो तर बडादसैँमा पनि सञ्चालन हुन नसकेको हो ।
समिट एयरले साप्ताहिक उडान गर्दै आएकोमा गत चैतदेखि बन्द रहेको धनगढी–बैतडी–धनगढी हवाइ उडान सेवा बन्द छ । कहिले यात्रु नपाइने समस्या त कहिले मौसम खराबीका कारण यहाँको उडान सेवा छ महिनादेखि बन्द रहेको हो । यसअघि बडादसैँलाई लक्षित गर्दै यही असोज ८ गते शनिबारदेखि नियमित हवाइ उडान हुने जनाइएको थियो ।
माथिबाटै बडादसैँमा यात्रु हुन्छन् भनेर असोज ८ देखि उडान भर्ने भनेर जानकारी आएको भए पनि यात्रु समस्याका कारण हुन नसकेको समिट एयर बैतडीका सम्पर्क व्यक्ति कृष्णदत्त भट्टले जानकारी दिनुभयो ।
साताको एक दिन बिहीबार समिट एयरले उडान भर्दै आएकामा गत चैत १० गते यहाँ अन्तिमपटक उडान भएको थियो । भट्टले भन्नुभयो– ‘दसैँ, तिहारका बेला यात्रु नियमित पाइन्छन् भनेर असोज ८ गतेदेखि फ्लाइट हुने जानकारी आएको थियो तर यात्रु अभावमा उडान हुन सकेन ।’
यसअघि बिहीबार हुँदै आएको हवाइ उडान असोज ८ गतेदेखि हरेक शनिबार साप्ताहिक रूपमा धनगढी–बैतडी–धनगढी उडान हुने समिट एयरले जनाएको थियो । बडादसैँमा समेत यात्रु अभाव भएपछि अब भने यहाँ कहिले उडान हुने भन्नेबारे अनिश्चित भएको छ ।
यात्रु नपाइनुको मुख्य कारण महंगो भाडा
बैतडीमा हवाइ उडान नहुनुका कारण यात्रु नपाइने भनेर भन्ने गरिएको छ तर यात्रुको गुनासो भने भाडा महङ्गो भएको रहेको छ । १७ मिनेटमै पुगिने यात्रामा भाडा भने महङ्गो भएको स्थानीय भागरथी भट्टले बताउनुभयो ।
उहाँले भन्नुभयो– ‘१७ मिनेटको यात्राका लागि पाँच हजार तिर्नु निकै महङ्गो हो । भाडादर घटाएपछि नियमित यात्रु पनि पाइन्थे, यात्रुलाई पनि सहज हुन्थ्यो ।’
१७ मिनेटको बैतडी–धनगढी हवाइ भाडा अबदेखि पाँच हजार रहेको छ । सुरुमा हवाई सेवा सञ्चालन हुँदा तीन हजार आठ सय ५० भाडा रहेकोमा त्यसपछि बढेर रु चार हजार ६०० पुगेको थियो ।
हाल अझै बढेर पाँच हजार पुगेको भट्टले बताउनुभयो । उहाँले भन्नुभयो– ‘इन्धनको मूल्य बढेकाले हवाइभाडा पनि बढेर आएको हो । हाल पाँच हजार निर्धारण गरिएको छ । घट्ने सम्भावना छैन ।’
हवाइ उडान नियमित नहुँदा आकस्मिक बिरामी भएकालाई लैजान तथा अन्य कामका लागि जान समस्या हुने गरेको छ । सार्वजनिक यातायातबाट धनगढी पुग्न कम्तीमा आठ घण्टा लाग्ने गर्दछ । नियमित उडान नहुँदा यहाँका नागरिक निराश भएका छन् । (रासस)
