यही साउन १३ देखि १५ गतेसम्म बुटवलमा राष्ट्रिय जनमोर्चाबाट निर्वाचित जनप्रतिनिधिहरुको प्रशिक्षण सम्पन्न भयो । कार्यक्रममा विभिन्न क्षेत्रका विज्ञले स्थानीय तह सञ्चालनबारे प्रशिक्षण दिएका थिए । सो प्रशिक्षणले स्थानीय तह सञ्चालनसम्बन्धी कानुनी, व्यवहारिक ज्ञान प्राप्त भएको र जनताको काम गर्न थप उत्साहित बनाएको प्रशिक्षणमा सहभागी जनप्रतिनिधिहरुले बताएका छन् ।

यसै सन्दर्भमा हामीले सो प्रशिक्षण कस्तो रह्यो भनेर सहभागी जनप्रतिनिधिलाई सोधेका छौँ । प्रस्तुत छ, राष्ट्रिय जनमोर्चाका केन्द्रीय सदस्यसमेत रहेका पाल्पाको रिब्दीकोट गाउँपालिका वडा नं ४ का अध्यक्ष सोमकुमार कार्कीसँग गरिएको छोटो कुराकानी :

राष्ट्रिय जनमोर्चाबाट निर्वाचित स्थानीय तहका जनप्रतिनिहरु तीन दिनसम्म बुटवलमा जुट्नुभयो । समग्रमा कार्यक्रम कस्तो रह्यो ?
बुटवलको प्रशिक्षण समग्रमा राम्रो रह्यो । जनप्रतिनिधिहरुलाई प्रचलित ऐन, नियम कानुनको बारेमा राम्रो जानकारी भएन भने काम गर्न गाह्रो हुन्छ । थोरै समयमा भएपनि प्रचलित नियम, कानुन तथा स्थानीय तह सञ्चालनका विभिन्न कानुनी विधिबारे बुझ्ने मौका पाइयो । पार्टीले प्रशिक्षण कार्यक्रम आयोजना गरेर उपयुक्त निर्णय गरेको अनुभव भएको छ ।

प्रशिक्षणमा थप नयाँ कुरा के सिक्नुभयो ?
नयाँ विषयवस्तु भन्दा पनि हामीलाई अहिले भएकै प्रचलित नियमकै बारेमा धेरै बुझ्नुपर्ने आवश्यकता छ । स्थानीय तहमा निर्वाचित भइसकेपछि बुझ्नुपर्ने, पढ्नुपर्ने कुराहरु पढ्न, बुझ्न भ्याएकै छैन । त्यसैले यो प्रशिक्षणले भएकै नियम, कानुन, विधि, विधानबारे अभिमुखिकरण गर्ने काम गरेको छ । विभिन्न विज्ञहरुले प्रविधिको माध्यमबाट बुझाउने प्रयास गर्नुभएको थियो । यसले कतिपय कुराहरुलाई छोटो समयमा बुझ्न मद्दत गरेको छ । बरु यसखालको प्रशिक्षण पार्टीले फेरि आयोजना गरोस् र अझ खँदिलो रुपमा विषयमवस्तु बुझ्ने अवसर प्राप्त होस् भन्ने चाहना छ ।

प्रशिक्षणमा के कस्ता विषयवस्तु समेटिएको थियो ?
खासगरी तीन तहका सरकारका काम, कर्तव्य र अधिकारबारे प्रशिक्षणलाई फोकस गरिएको थियो ।

तीन वटा तहका सरकारहरुका कतिपय साझा र कतिपय एकल अधिकारहरु छन् । आर्थिक नीति, कर नीति, विकास निर्माणका योजना सञ्चालनबारे आ–आफ्ना अधिकारहरु छन् । जनतासँग प्रत्यक्ष जोडिएको स्थानीय तह सञ्चालन गर्ने छुट्टै विधि र प्रक्रियाहरु छन् । स्थानीय तह, अझ खासगरी वडाअध्यक्ष दैनिक जनतासँग प्रत्यक्ष जोडिएर काम गर्नुपर्ने हुन्छ । जस्तो कि पञ्जिकरणसँग सम्बन्धित काम वडासचिवले गर्ने भएपनि त्यसमा वडाअध्यक्ष सिधै ठोकिन्छ । स्थानीय तहमा धेरै समस्याहरु छन् । जनताका दैनन्दिनका समस्या विधि र प्रक्रियाबाट हल गर्नुपर्ने हुन्छ । यिनै विषयवस्तुलाई प्रशिक्षणमा प्राथमिकता दिइएको थियो ।

स्थानीय तहमा निर्वाचित अन्य पार्टीका जनप्रतिनिधि र राजमोका प्रतिनिधिबीच के अन्तर हुन सक्छ ?
हाम्रो पार्टी जनपक्षीय पार्टी भएको हुनाले हामीले जहिले पनि जनताको हितमा काम गर्छौँ । अरु जनप्रतिनिधि भन्दा हामी सिर्जनात्मक हुन्छौँ । जनमैत्री भएर काम गर्छौैँ । कतिपय नियम कानुनहरु जनपक्षीय छैनन् । तर हामी नियम कानुनलाई पनि जनताको हित अनुकुल प्रयोग गरेर बढीभन्दा बढी जनतालाई सेवा दिन लागिपरेका हुन्छौँ ।

अन्य दल र हामीमा फरक के हो भने अरुले चुनाव जित्नकै लागि ठूलो परिमाणमा पैसा खर्च गरेका हुन्छन् । चुनाव जितेर गइसकेपछि अधिकांशमा चुनाव खर्च उठाउन खोज्ने प्रवृति देखिन्छ । त्यसका लागि मानिस भ्रष्टाचार गर्छ । यदी हामी पनि त्यस्तै भयौँ भने हाम्रो औचित्य के नै रहन्छ र ? बरु कांग्रेस एमाले बने सजिलोसँग चुनाव पनि जितिन्छ ।

यसो भनिरहँदा अन्य दलका सबै मानिसहरु खराब र भ्रष्ट भन्न खोजेको होइन । एकाधरुपमा लोभिपापी त जनमोर्चामै पनि हुनसक्छन् । कांग्रेस, एमालेबाट मन्त्री बनेका कैयौँ मानिसहरु विवादरहित पनि छन् । विभिन्न तहका कैयौँ जनिप्रतिनिधिहरु स्वच्छ छवि बनाएर बाहिरिएका मानिसहरु अरु पार्टीमा पनि छन् ।

हामी इमान्दार भएर मात्रै पुग्दैन । स्वच्छ र इमान्दारितासँगै सिर्जनात्मक पनि हुनुपर्यो । जनताको काम सहज ढंगले गरिदिनुपर्यो । जनतालाई आवश्यक परेको बेला उपलब्ध हुने र समस्या समाधान गर्न सक्नुपर्छ । कयौँ नियम कानुनहरु जनताको पक्षमा छैनन् । तर हामीले काम गर्दा नियम कानुनलाई पनि जनहितमा प्रयोग गर्न सक्नुपर्छ ।

राजमो जनप्रतिनिधिको प्रशिक्षण समापन