काठमाडौं, असोज ३ । संविधान दिवस २०८३ को अवसरमा भारत प्रवासमा रहेका नेपालीहरूको साझा संगठन मूल प्रवाह अखिल भारत नेपाली एकता समाजले नेपालको संविधान, गणतन्त्र र धर्मनिरपेक्षताको रक्षा गर्न लोकतान्त्रिक तथा गणतान्त्रिक शक्तिहरूलाई एकजुट हुन आह्वान गरेको छ।
प्रेस वक्तव्य जारी गर्दै अध्यक्ष प्रेम पौडेलले राणा शासनदेखि गणतन्त्र स्थापनासम्म नेपाली जनताले गरेको लामो संघर्ष र हजारौं सहिदको बलिदानबाट प्राप्त उपलब्धिको संरक्षण गर्नुपर्ने बताएका छन्। २०६२/०६३ को जनआन्दोलनपछि संविधानसभाबाट संविधान निर्माण हुनु ऐतिहासिक उपलब्धि भएको उल्लेख गर्दै उनले संविधान निर्माण प्रक्रियामा प्रवासी नेपालीलाई सहभागी नगराइएको गुनासो पनि गरेका छन्।
वक्तव्यमा वर्तमान राजनीतिक गतिविधिले राष्ट्रियता, लोकतान्त्रिक अधिकार तथा संविधानका मूल मान्यतामाथि चुनौती उत्पन्न गरेको दाबी गरिएको छ। प्रत्यक्ष निर्वाचित कार्यकारी प्रमुखको व्यवस्थाले संसदीय प्रतिपक्षको भूमिका कमजोर पार्न सक्ने भन्दै त्यस्तो व्यवस्थाप्रति पनि वक्तव्यमा आपत्ति जनाइएको छ।
त्यस्तै, धर्मनिरपेक्षतालाई संविधानको महत्वपूर्ण उपलब्धि भन्दै जातीय तथा धार्मिक सद्भाव कायम राख्न र सबै समुदायलाई समान अधिकार तथा अवसर सुनिश्चित गर्नुपर्नेमा जोड दिइएको छ।
वक्तव्यमा संघीयताको भने स्पष्ट विरोध गरिएको छ। संघीयता नेपाली जनताको माग नभएको दाबी गर्दै त्यसलाई खारेज गरी स्थानीय विकेन्द्रीकरणमा आधारित एकात्मक शासन प्रणाली उपयुक्त हुने धारणा अघि सारिएको छ।
वर्तमान संविधानलाई पूर्ण रूपमा आदर्श नमानिए पनि गणतन्त्र, धर्मनिरपेक्षता र संविधानको रक्षा तत्कालीन परिस्थितिमा आवश्यक रहेको उल्लेख गर्दै वक्तव्यले भारत प्रवासमा रहेका लोकतान्त्रिक, गणतान्त्रिक शक्ति तथा आम नेपाली समुदायलाई संविधान र प्राप्त अधिकारको रक्षाका लागि एकताबद्ध हुन आह्वान गरेको छ।
