पोखरा । अखिल नेपाल राष्ट्रिय उद्योग व्यापार संघ, कास्कीले बन्द भएका ठूला उद्योग सञ्चालन गर्न सरकारसँग माग गरेको छ । संघले सोमबार गण्डकी प्रदेशका मुख्यमन्त्री कृष्णचन्द्र पोखरेललाई विभिन्न माग राखी ज्ञापन पत्र बुझाएको छ ।
सो ज्ञापन पत्रमा प्रदेशका महत्वका उद्योगहरू (भृकुटी कागज कारखाना र गोरखकाली टायर उद्योग) तुरून्त सञ्चालनमा ल्याउन माग गरिएको छ । यस्तै, लाखौं युवालाई स्वदेशमै रोजगारी सिर्जना गर्न स्वदेशी कच्चापदार्थमा आधारित उध्योग स्थापना र प्रवर्द्धनका
लागि आवश्यक नीति निर्माण गर्न माग गरिएको छ ।
ज्ञापन पत्रमा गण्डकी प्रदेशमा एक पालिका एक उत्पादन, एक जिल्ला एक औधोगिक करिडोर र उत्पादनको बजारीकरण को नीति अवलम्बन गर्नुपर्ने, वैज्ञानिक भू–उपयोग नीति लागू गरि कृषिमा आधुनिकीकरण, औजारीकरणर र औधोगिकरण गरी निर्वाहमुखी कृषिलाई
व्यवसायीकरण गर्नुपर्ने, विश्व बजारको मागलाई मध्यनजर गरि निर्यातजन्य वस्तुको पहिचान गरि उत्पादन गरिएको वस्तुले राष्ट्रिय
अन्तर्राष्ट्रिय स्तरमा प्रदेशको पहिचान हुने गरि ‘प्रदेशको उत्पादन प्रदेशको सान ‘कार्यक्रम लागू गर्नुपर्ने लगायत माग समावेश गरिएको छ ।
यसैगरी, नीतिगत भ्रष्टाचारको कारण देशको अर्थतन्त्रमा खराब प्रभाव बढ्दै गएकोले भ्रष्टाचार नियन्त्रणमा शून्य शहनशीलताको नीति अबलम्बन गर्न, कम्तिमा एक पालिकामा कृषिलाई पर्यटनसँग जोड्न एग्रोटरीज्म कार्यक्रम लागू गर्न तथा वास्तविक किसानहरू पहिचान गरि निजका परिवारलाई निःशुल्क शिक्षा र स्वस्थ्यको जिम्मा राज्यले लिई कृषिमा गरिने योगदानको आधारमा किसानलाई पेन्सनको व्यवस्था गर्नसमेत माग गरिएको छ ।
मुलुकको अर्थतन्त्रले साधारण खर्च समेत धान्नै नसक्ने अवस्था रहेकोले स्थानीय तहलाई पूर्ण अधिकार सम्पन्न बनाई
प्रदेश संरचना खारेज गर्नसमेत ज्ञापन पत्रमा माग गरिएको छ ।
अध्यक्ष प्रकाश बरालको नेतृत्वमा गएको प्रतिनिधिमण्डलमा गण्डकी प्रदेशका सांसद पियारी थापा, राष्ट्रिय जनमोर्चा गण्डकी प्रदेश अध्यक्ष शंकर बराल, राष्ट्रिय उद्योग व्यापार संघका महासचिव ढाकारम पौडेल लगायत सहभागि हुनुहुन्थ्यो ।
