काठमाडौं । श्रीलंकामा विपक्षी नेता रनिल विक्रमसिङ्ग प्रधानमन्त्री नियुक्त भएका छन् । राष्ट्रपति गोटाबय राजपाक्षलेले विक्रमसिङ्गलाई प्रस्तावित संयुक्त सरकारको नेतृत्व गर्ने शपथ गराएका हुन् ।
उनका दाइ महिन्दा राजपक्षले सोमबार प्रधानमन्त्री पदबाट राजीनामा दिएका थिए ।
आफ्नो सम्बोधनमा राष्ट्रपति राजपक्षले संसद्मा बहुमत प्राप्त गर्ने र नयाँ मन्त्रिपरिषद्को नेतृत्व गर्ने गरी नयाँ प्रधानमन्त्री नियुक्त गर्ने बताएका थिए।
विक्रमसिङ्ग श्रीलङ्काको राजनीतिक परिदृश्यमा दशकौँदेखि रहँदै आएका छन्। संसद्को एक सिट मात्रै रहेको दलको नेतृत्व गर्ने उनको प्रधानमन्त्रीका रूपमा यो छैटौँ कार्यकाल हुनेछ।
यद्यपि उनी कहिल्यै पनि पूर्ण कार्यकाल प्रधानमन्त्री हुन पाएका छैनन्।उनलाई राजपक्षको नजिकको व्यक्तिका रूपमा हेरिएको छ।
श्रीलंकामा फैलिएको अशान्तिमा नौ जनाको मृत्यु भइसकेको छ भने दुई सय जना घाइते भएका छन्। श्रीलंकाको अर्थतन्त्र कमजोर छ र खाद्यान्न र इन्धन जस्ता आधारभूत वस्तुहरू सकिन वा किन्न नसकिने भएकाले मानिसहरू निराश छन्।
