साओपाओलो । ब्राजिलमा दुई दिनयताको वर्षा र त्यसँगै आएको भिषण बाढीपहिरोमा परी अहिलेसम्ममा १८ जनाको ज्यान गएको छ ।
यहाँको बाढीका कारण अरू पनि कैयौँ व्यक्ति विस्थापित भएका छन् । बाढीले मृत्यु हुनेको सङ्ख्या अहिलेसम्म १८ पुगेको अधिकारीहरूले जनाएका छन् ।
ब्राजिलको साओपाओलो सहर सबैभन्दा बढी प्रभावित रहेको छ । सो सहरमा मात्र १८ जनाको मृत्यु भएको अधिकारीले जनाएका छन् ।
साओपाओलो राज्यका गभर्नर जोयो दोरियाले भन्नुभएको छ– ‘हामी निकै पीडामा छौँ कि यहाँका कम्तीमा पनि १८ जना नागरिकले ज्यान गुमाएका छन्, भारी मात्रामा वर्षा जारी नै छ ।’
उहाँले राज्यको प्रहरी र सेना तथा अरू पनि उद्धारकर्मीहरू उद्धारका लागि जुटिरहेको बताउनुभएको छ ।
उहाँले भन्नुभएको छ– ‘हामी उद्धारका काममा जुटिरेहका छौँ तर भारी वर्षाका कारणले गर्दा उद्धारको काममा पनि समस्या उत्पन्न भएको छ । करिब २० हजार नागरिक घरबाट भागेर अन्यत्रै बसेका छन् । उनीहरू बढीका कारण विस्थापित भएका बताइएको छ ।’
बाढीपछि यस राज्यमा आपतकाल घोषणा गरिएको छ । अधिकांश ग्रामीण भेगमा विद्युत सेवा अवरुद्ध भएको छ भने सडक बगाउँदा यातायात प्रभावित भएको छ ।
मौसमविद्हरूले वर्षाको प्रकोप अझै रहेकाले घरबाहिर ननिस्कन भनिरहेका छन् । उनीहरूले वर्षा र आँधीको पनि सम्भावना रहेको चेतावनी दिएका छन् । (रासस/सिन्ह्वा)
