वासिङटन । कोरोनाको पूर्ण मात्रा खोप लगाएका विदेशी यात्रुहरूलाई अमेरिकाले सोमबारबाट आफ्नो सीमा खुला गर्दै छ । बिस महिना लामो आवागमन प्रतिबन्ध अन्त्य गर्दै अमेरिकामा सोमबारबाट सो निर्णय लागु गर्न लागेको हो ।
पूर्व राष्ट्रपति डोनाल्ड ट्रम्पले कोभिड १९ का कारण २०२० को मार्च महिनामा उक्त प्रतिबन्ध लगाउनुभएको थियो । ब्रिटेन र युरोपेली सङ्घका देशसहित ३० भन्दा बढी देश अमेरिकी नियमबाट प्रभावित हुँदा पारिवारिक पुनर्मिलन हुन पाएको थिएन । यस प्रतिबन्धको कारण पर्यटन क्षेत्रमा ठुलो धक्का पुगेको थियो ।
नयाँ नियमसँगै विमानसेवाहरूले आगन्तुकको आउने जाने क्रम बढ्ने अपेक्षा गरेका छन् । आगन्तुकको खोपको अवस्थालाई निकै सजगतापूर्वक हेरिने अधिकारीहरूले बताएका छन् ।
युनाइटेड एअरलाइन्सले अमेरिका आउने अन्तर्राष्ट्रिय यात्रु ५० प्रतिशतले बढ्ने अपेक्षा गरेको छ । डेल्टा एअरलाइन्सका प्रमुखले केही यात्रुहरू पालो पर्खेर बस्नुपर्ने अवस्था आउन सक्ने बताएका छन् ।
अब यात्रुले उड्नुअगावै पूर्ण मात्रा खोप लगाएको प्रमाणपत्र, यात्राको तीन दिनभित्रको कोभिड नेगिटिभ देखिएको परीक्षण र आफ्ना सम्पर्क विवरण बुझाउनुपर्ने छ । अन्तर्राष्ट्रिय रूपमा प्रयोगमा आएका सात मुख्य खोपलाई त्यस क्रममा मान्यता दिइँदै छ ।
कोभिड फैलनबाट रोक्ने उद्देश्यले सन् २०२० को सुरुतिरै चिनियाँ यात्रुलाई अमेरिका आउन रोकिएको थियो र त्यसपछि प्रतिबन्ध अन्य देशका लागि विस्तार गरिएको थियो । (रासस/एएफपी)
