वासिङटन । अमेरिकाका पूर्व राष्ट्रपति डोनाल्ड ट्रम्पले नयाँ सामाजिक सञ्जाल सञ्चालनमा ल्याउने घोषणा गर्नुभएको छ ।
बहुचर्चित सामाजिक सञ्जालहरू ट्विटर र फेसबुकले उहाँका आधिकारिक एकाउन्ट हटाइदिएपछि उहाँले यस्तो घोषणा गर्नु भएको हो ।
अमेरिकामा गत वर्ष भएको राष्ट्रपतीय निर्वाचनका बेलामा तत्कालीन राष्ट्रपति ट्रम्पले आफै भ्रम फैलाएको, सामाजिक सद्भावलाई असर पारेको लगायतका आरोप लगाउदै ती सामाजिक सञ्जालहरूले उहाँको एकाउन्ट हटाइदिएका थिए । विषेश गरेर ट्रम्पका समर्थकको भिड अमेरिकी संसद् भवनमा प्रवेश गरेको घटनापछि उहाँलाई ट्विटर र फेसबुकले आफ्ना सञ्जालबाट हटाएका थिए ।
उनीहरूले हटाएपछि पूर्व राष्ट्रपति ट्रम्पले आफ्ना अपडेट सार्वजनिक गर्न छुट्टै ब्लग जस्तै अनलाइन सञ्चालन गर्नुभएको थियो तर त्यो पनि केही समयपछि बन्द भएको छ ।
आगामी सन् २०२४ मा हुने राष्ट्रपतीय निर्वाचनमा पनि उम्मेदवारी दिने तयारीमा रहनुभएका ट्रम्पले त्यसैलाई लक्षित गरेर नयाँ सामाजिक सञ्जाल सञ्चालन गर्न लाग्नुभएको जनाइएको छ ।
उहाँले सञ्चालन गर्न लागेको सामाजिक सञ्जालको नाम “ट्रुथ सोसियल” राख्ने पनि तय भइसकेको उहाँले सचिवालयले जनाएको छ । ट्रुथ सामाजिक सञ्जालको सञ्चालन ट्रम्प मिडिया एन्ड टेक्नोलोजी गु्रप (टी.एम.टी.जी.) ले गर्ने भएको छ । गु्रपको अध्यक्ष ट्रम्प आफै रहनुभएको छ ।
ट्रम्पले उक्त सामाजिक सञ्जाल प्रविधिसम्बन्धी ठुला कम्पनीको अत्याचार विरुद्ध उभिने बताउनुभएको छ । अहिले प्रभावशाली रहेका सामाजिक सञ्जालले अमेरिकाका विद्रोही आवाजलाई स्थान नदिएको ट्रम्पको आरोप छ ।
ट्रुथ सामाजिक सञ्जालमा भिडिओ प्रसारण सेवा पनि समावेश गरिने भएको छ । भिडिओ सेवामा समाचार, पडकास्टलगायतका धेरै सुविधा उपलब्ध गराइने टी.एम.टी.जी. ले जानकारी दिएको छ । सो सामाजिक सञ्जाल आगामी महिनादेखि केही आमन्त्रित प्रयोगकर्ताका लागि तयार हुने छ भने सन् २०२२ को पहिलो तीन महिना अमेरिकामा मात्रै उपलब्ध हुने छ । (रासस/एएफपी)
