लन्डन । बेलायतमा पछिल्लो समयमा कोरोना सङ्क्रमण बढ्दै गएसँगै मृत्यु हुनेको सङ्ख्यामा पनि वृद्धि भएको छ ।
यहाँ गत २४ घन्टामा कम्तीमा पनि २२३ जनाको ज्यान गएको छ । यो मृत्युयसै वर्षको गत मार्च ९ पछिकै सबैभन्दा धेरै हो ।
सात महिनाअघि त्यस दिन यहाँ कोरोना सङ्क्रमणबाट कम्तीमा पनि २३१ जनाको ज्यान गएको थियो ।
उता, यहाँ २४ घन्टायता मात्र कोरोना सङ्क्रमणका करिब ५० हजार सङ्क्रमित भेटिएका छन् । मङ्गलबार यहाँका सङ्क्रमितहरू करिब ५० हजार जनाको नजिक पुगेको थियो ।
बेलायतका अधिकारीहरूले कोरोना सङ्क्रमण घट्न नसकेको देखिएको बताएका छन् । यहाँका स्वास्थ्य अधिकारीले सामाजिक क्रियाकलापमा प्रतिबन्ध लगाउन माग गरेका छन् ।
बेलायतका स्वास्थ्य वैज्ञानिकले पनि यो सुझाव दिएका छन् । उनीहरूले यहाँ हरेक दिन करिब ५० हजार जना सङ्क्रमित भेटिनु र मृत्यु दर पनि हरेक दिन २०० भन्दा माथि हुनुलाई गम्भीर भन्दै यहाँका सामाजिक क्रियाकलापमा प्रतिबन्ध लगाउनुपर्ने बताएका हुन् ।
यहाँ गएको २४ घन्टायता करिब ४४ हजार जना सङ्क्रमित भएका छन् । यो समेत गरी यहाँ सङ्क्रमित हुनेको सङ्ख्या ८५ लाख पुगेको छ ।
महिनौँपछि यहाँ ठुलो सङ्ख्याका सङ्क्रमितहरू पाइएका भन्दै प्रधानमन्त्री बोरिस जोन्सनले थप सतर्कताका लागि आग्रह गर्नुभएको छ । यहाँका स्वास्थ्य अधिकारीले यहाँ धेरै समयपछि मृत्यु हुनेको सङ्ख्या पनि बढ्न थालेको बताएका छन् ।
बेलायतमा कोरोनाबाट सङ्क्रमित भएकामध्ये सात हजार ७०० जना अझै पनि अस्पतालमै उपचाररत रहेका छन् । (रासस/सिन्ह्वा)
