काबुल । अफगानिस्तानको कान्दाहार सहरमा रहेको एउटा मस्जिदमा शुक्रबार भएको बम विस्फोटमा परी ज्यान जानेको सङ्ख्या ३२ पुगेको छ ।
सिया मुस्लिम समुदायका नागरिकको सो मस्जिदमा शुक्रबारको प्रार्थनाका बेलामा सो विस्फोट भएको थियो ।
शुक्रबार अपराह्न एकैपटक तीनओटा विस्फोट भएको थियो । विस्फोटमा परेर कम्तीमा ३२ जनाको ज्यान गएको छ भने अरू कम्तीमा पनि ६८ जना घाइते भएका छन् । उक्त मस्जिदका झ्यालका सिसा फुटेको र शव भुइँमा देखिएका तस्बिर सञ्चार माध्यमले दिएका छन् ।
तीन जना हमलाकारीले आक्रमण गरेको प्रत्यक्षदर्शीले एक स्थानीय पत्रकारलाई बताए । प्रत्यक्षदर्शीका अनुसार एक जना आक्रमणकारीले सो मस्जिदको प्रवेशद्वारमा विस्फोट गराएको हो । अरू दुई जना भने मस्जिदभित्रै प्रवेश गरेर आक्रममण गरेका थिए । त्यस समयमा सो मस्जिदमा शुक्रबारको प्रार्थना भइरहेको थियो । शुक्रवारको साप्ताहिक प्रार्थना भएकाले मस्जिद पूरै भरिभराउ रहेको थियो ।
सोही मौका छोपेर यस्तो हमला गराइएको अनुमान गरिएको छ । तालिबानका सशस्त्र लडाकुले पनि घटनास्थलमा सुरक्षा दिइरहेको बताएको छ । साथै यहाँका मस्जिदमा हिंसात्मक हमला हुने गरेकाले सुरक्षाकर्मीले पनि मस्जिदमा सुरक्षा दिइरहेको बताइएको थियो ।
सुरक्षा परिषद् र पाकिस्तानद्वारा निन्दा
सो बम विस्फोटको पाकिस्तानले कडा शब्दमा निन्दा गरेको छ । पाकिस्तानको विदेश मन्त्रालयले शुक्रबार साँझ नै एक विज्ञप्ति प्रकाशन गरी सो हमलाको निन्दा गरेको हो ।
नागरिकले आफ्नो धार्मिक आस्था व्यक्त गर्ने मस्जिद जस्तो स्थानमा गएर उनीहरूको हत्या गर्नु एक प्रकारको जघन्य अपराध भएको सो विज्ञप्तिमा जनाइएको छ ।
त्यस्तै, सो हिंसात्मक हमलाको संयुक्त राष्ट्र सङ्घको सुरक्षा परिषद्ले पनि निन्दा गरेको छ । सुरक्षा परिषद्को शुक्रबारको बैठकले सो हमलाको निन्दा गर्दै यस्ता जघन्य अपराधमा संलग्नलाई कडाभन्दा कडा कारबाही गर्न पनि माग गरेको छ । (रासस/सिन्ह्वा)
