न्युयोर्क । संयुक्त राष्ट्र सङ्घ सुरक्षा परिषद्ले सुडानमा कूको प्रयासको कडा शब्दमा निन्दा गरेको छ ।
सुरक्षा परिषद्का सदस्यहरूले प्रेसवक्तव्य जारी गर्दै प्रधानमन्त्री अब्दुल्लाह हमदोकको पक्षमा समर्थन व्यक्त गरेका हुन् ।
सुडानमा जारी सङ्क्रमणको अन्त्य गर्दै समावेशी, शान्तिपूर्ण, सन्तुलित रूपले जनताको आशा र आकाङ्क्षा प्राप्त गर्ने प्रयासमा आफूहरू सहयोगी हुने विश्वास उनीहरूले व्यक्त गरेका छन् ।
परिषद्का सदस्य राष्ट्रहरू सम्बन्धित पक्षलाई “राष्ट्रिय सङ्कट” र “सङ्क्रमणको विषय” लाई गम्भीर रूपले बुझ्न र सोही अनुरूप अगाडि बढ्न उनीहरूको आग्रह छ ।
विज्ञप्तिमा भनिएको छ– “सुडानमा जनता र सैनिक पक्षले सहमति र सहकार्यका साथ संविधान र जुबा शान्ति सम्झौताको मर्मअनुरूप अगाडि बढ्न र देशको सङ्क्रमणलाई पार लगाउन आग्रह गर्दछौँ ।”
त्यसैगरी परिषद्का सदस्य राष्ट्रहरूले सुडानी जनता र देशका पक्षमा ऐक्यबद्धता व्यक्त गर्दै सङ्क्रमणको यस चरणमा सुडानको सम्प्रभुता, स्वतन्त्रता, भौगोलिक अखण्डता, राष्ट्रिय एकताको पक्षमा प्रतिबद्धता व्यक्त गरेका छन् ।
यसअघि राष्ट्र सङ्घका महासचिव एन्टिनियो गुटेरेसले सो घटनाको निन्दा गरिसकेका छन् ।
दक्षिण सुडनाद्धारा निन्दा
त्यस्तै, दक्षिण सुडानले पनि कू प्रयासको निन्दा गरेको छ । सो प्रयासलाई दक्षिण सुडानले प्रजातान्त्रिक प्रक्रियामाथिको हमला भनेको छ ।
अहिले सुडान राजनीतिक सङ्क्रमणबाट गुज्रिएकाले यसलाई राजनीतिक स्थायित्वतर्फ लैजान प्रयास गर्नुको सट्टा राजनीतिक कूको प्रयास गर्नु निन्दनीय भएको दक्षिण सुडानको विदेश मन्त्रालयले जनाएको छ ।
सुडान अहिले राजनीतिक सङ्क्रमण कालको चरणमा रहेकाले यहाँका राजनीतिक दलले यसअघि गरेका प्रतिबद्धतानुसार प्रजातन्त्र सुदृढ गर्न लाग्नुपर्ने सो मन्त्रालयले भनाइ छ । (रासस/सिन्ह्वा)
