काबुल । अफगानिस्तानमा तालिबानले छात्रालाई पनि अध्ययनका लागि विश्वविद्यालय जान अनुमति दिने निर्णय गरेको छ । तर एउटै कोठामा छात्राछात्रलाई सँगै राख्न भने पाइने छैन ।
तालिबानको सत्ता आएपछि छात्रालाई विश्वविद्यालय जान प्रतिबन्ध लगाउने आशङ्काकामाझ उनीहरूले विश्वविद्यालय जान दिने बताएका हुन् । सरकारका शिक्षामन्त्रीले यस्तो निर्देशन दिएका हुन ।
विश्वविद्यालयमा छात्रालाई पनि जान दिने निर्णयलाई तालिबानको यसअघि सन् १९९६ देखि २००१ सम्मको शासन व्यवस्थाभन्दा लचक हुने सङ्केतको रूपमा लिइएको छ । अघिल्लो शासनकालमा अफगानिस्तानमा महिला र बालिकालाई विद्यालय र विश्वविद्यालयमा जान प्रतिबन्ध लगाइएको थियो ।
विश्वविद्यालयलाई लिङ्गको आधारमा पोसाकसम्बन्धी नयाँ नियम लागु पनि गरिने तालिबानले जनाएको छ ।
उच्च शिक्षासम्बन्धी मन्त्री अब्दुल बाकी हक्कानीले विद्यार्थीलाई अध्यापन गराइने विषयको समीक्षा गरिने पनि जानकारी दिनुभयो ।
तालिबानले महिलालाई शिक्षा र रोजगारीमा प्रतिबन्ध नलगाउने जनाएको छ । तर गत अगस्ट १५ मा सत्ता आफ्नो हातमा लिएसँगै तालिबानले सुरक्षा अवस्थामा सुधार नआएसम्म स्वास्थ्यकर्मीबाहेक अन्य महिलालाई कामबाट टाढै बस्न निर्देशन दिएको छ ।
तालिबानको अघिल्लो पटकको आफ्नै शासनकालमा भन्दा केही लचक भए पनि निवर्तमान सरकारभन्दा अहिलेको सरकार कठोर देखिएको छ । (रासस/एएफपी)
