काठमाडौं । भारतको हिमाञ्चल प्रदेशमा राजमार्गमा पहिरो खस्दा बस, ट्रकलगायत सवारी साधनहरू पुरिएका छन् । घटनास्थलबाट १३ जनाको शव निकालिएको छ भने अन्य कैयौं व्यक्तिहरू पुरिएका छन् ।
बुधवार किन्नौर जिल्लामा भएको घटनामा १० जनाको जीवित उद्धार गरिएको छ । झन्डै ३० जना अझै पहिरोमा पुरिएको आशंका गरिएको छ।
डाँडाबाट खसेको ढुंगामाटो एउटा ट्रक, एउटा बस र केही साना सवारीसाधनमाथि बज्रिएका थिए । सरकारी अधिकारीहरूका अनुसार ढुङ्गामाटो खस्न नरोकिएकाले उद्धारकार्य प्रभावित भएको छ । भारत–तिब्बत सीमा सुरक्षाका लागि खटिएका प्रहरीहरू उद्धारकार्यमा परिचालित भएका छन् ।
गत महिना हिमाचल प्रदेशमै एउटा डाँडाबाट अचानक ढुंगामाटो खस्दा एउटा यात्रुवाहक बसमा चढेका नौ पर्यटकको मृत्यु भएको थियो ।
यो वर्ष पश्चिम भारतको महाराष्ट्रमा ठूलो वर्षा भएपछि सयौँ गाउँहरू जलमग्न भएका थिए । त्यहाँ कम्तीमा १३६ जनाको मृत्यु भएको बताइन्छ।
