जीवन शाही, सुर्खेत ।
सुर्खेतको वीरेन्द्रनगरमा राष्ट्रिय जनमोर्चाको नगर भेला सम्पन्न भएको छ । शनिबार भएको भेलाले फागुन १ गते प्रथम नगर सम्मेलन को घोषणा गर्दै विष्णु शर्माको संयोजकत्वमा १७ सदस्यीय नगरसम्मेलन आयोजक समिति चयन गरेको छ ।
समितिको सदस्यमा हेमराज शर्मा ,शिव नेपाली, पूर्ण तिवारी, भिम थापा, राजकुमारी सुनार, मानप्रसाद जैशी, लक्ष्मी जैशी, हरि बुढा, किरण शाही, चन्द्रबहादुर नेपाली, मानबहादुर बडुवाल, राकेस बसेल, ललिता शर्मा, प्रतिमा सञ्ज्याल, भानुभक्त भारती र दधिराम गौतमलाई चयन गरेको छ । आयोजक समितिको ५ सदस्यीय सचिवालय पनि गठन भएको छ । सचिवालयमा विष्णु शर्मा, हेमराज शर्मा, भानुभक्त भारती, किरण शाही र प्रतिमा सञ्ज्याल रहनुभएको छ ।
भेलालाई सम्बोधन गर्दै राष्ट्रिय जनमोर्चाका केन्द्रीय सदस्य रत्नविक्रम राना प्याशीले अहिले गणतन्त्रमाथि नै खतरा उत्पन्न हुन थालेको बताउनुभयो । एकातिर राजावादीबाट गणतन्त्रमाथि खतरा देखा परिरहेको र अर्कोतिर विप्लप माओवादीहरुले पनि राजासहितको गोलमेच सम्मेलनको कुरा गरेको स्थितिमा जनआन्दोलनबाट प्राप्त उपलब्धिलाई जोगाउन चुनौतिपूर्ण रहेको उहाँले बताउनुभयो ।
तत्काल ओली सरकारले गरेको असंवैधानिक कदम संसद विघटनको विरुद्ध संसद पुनर्स्थापनाको माग लिएर आफ्नो पार्टी राष्ट्रिय जनमोर्चा संघर्षमा उत्रिएको उहाँको भनाई छ । गणतन्त्र, राष्ट्रियता र धर्मनिरपेक्षताको रक्षा गर्न तथा ओली सरकारले गरेको असंवैधानिक कदम संसद विघटन, भ्रष्टाचार संघीयताको बिरोध गर्न पार्टीले घोषणा गरेको १ महिने संघर्ष तथा संगठन निर्माणको अभियानमा सक्रियतापूर्वक लाग्नको लागि केस प्याशीले कार्यकर्ताहरुलाई आव्हान पनि गर्नुभयो ।
