जगदीश ढकाल, नेपालगञ्ज ।
राष्ट्रिय जनमोर्चाका पूर्व महासचिव एवम् पूर्व सांसद हरि आचार्यले संसद विघटन गरेर आफै सांसद नरहेका प्रधानमन्त्रीले मन्त्रिमण्डल विस्तार गर्नु अधिनायकवादी कार्य भएको बताउनुभएको छ ।
बुधबार बाँकेको राप्ती सोनारी गाउँपालिकाको कुसुम बजारमा आयोजित विरोध सभामा बोल्दै नेता आचार्यले प्रतिनिधि सभा विघटन गरेर सरकारले घोर अप्रजातान्त्रिक कार्य गरेको बताउनुभयो ।
उहाँले संघीयता खारेज गर्नुपर्नेमा प्रधानमन्त्री केपी ओलीले प्रतिनिधि सभा विघटन गरेर उल्टो बाटो हिँडेको आरोप पनि लगाउनुभयो । प्रतिनिधि सभाको पुनर्स्थापना र संघीयताको खारेजी देशको तात्कालिक आवश्यकता रहेकोमा आचार्यले जोड दिनुभयो ।
विरोध सभामा अखिल नेपाल युवक संघका महासचिव कृष्णराज पाण्डे, जातीय समता समाजका वैकल्पिक केन्द्रीय सदस्य मनबहादुर सुनार, अखिल नेपाल महिला संघकी वैकल्पिक केन्द्रीय सदस्य पूर्णकला भण्डारी लगायत नेताहरुले सम्बोधन गर्नुभएको थियो ।
अखिल नेपाल युवक संघका जिल्ला अध्यक्ष भरत खड्काले सञ्चालन गर्नुभएको सभामा अखिल नेपाल किसान महासंघका महासचिव तुल्सीराम सापकोटा र राजमो बाँकेका अध्यक्ष भिमप्रसाद देवकोटालगायत नेताहरुको आतिथ्यता रहेको थियो ।
‘प्रतिनिधि सभाको पुनर्स्थापना, संघीयताको खारेजी, भ्रष्टाचारको विरोध, राष्ट्रियता, धर्मनिरपेक्षता र गणतन्त्रको रक्षा’लगायतका विषयमा राजमो बाँकेले विभिन्न क्षेत्रमा विरोध कार्यक्रम गरिरहेको छ । अबको कार्यक्रम कुसुम, वैजापुर, फत्तेपुर, कम्दी, वेतहनी, भवानीपुर लगायतका स्थानमा हुनेछ ।
