मस्को,२२ चैत । रूसका विभिन्न क्षेत्रमा आइतबार गरिएको ड्रोन आक्रमणमा कम्तीमा सात सर्वसाधारण घाइते भएका छन् भने उत्तरपश्चिमी क्षेत्रमा रहेको एक महत्वपूर्ण तेल पाइपलाइनमा क्षति पुगेको छ।
रूसको बेलगोरोद क्षेत्रमा पर्ने ग्रायभोरन जिल्लाको जामोस्त्ये गाउँमा ड्रोन आक्रमण हुँदा सर्वसाधारण बोकेको मिनीबस लक्षित भएको बताइएको छ। क्षेत्रीय गभर्नर भ्याचेस्लाभ ग्लाडकोभका अनुसार उक्त आक्रमणमा सात जना घाइते भएका छन्, जसमा एक जनाको अवस्था गम्भीर रहेको छ।
त्यसैगरी, लेनिनग्राद क्षेत्रमा हवाई प्रतिरक्षा प्रणालीले आइतबार बिहान १९ वटा ड्रोन खसालेको जनाएको छ। क्षेत्रीय गभर्नर अलेक्जेन्डर द्रोज्देन्कोका अनुसार ड्रोनका भग्नावशेष बाल्टिक सागर किनारमा रहेको प्रिमोर्स्क बन्दरगाह नजिकको तेल पाइपलाइनमा खस्दा आगलागी भएको थियो।
उक्त घटनामा मानवीय क्षति नभएको तर पाइपलाइनको केही भागमा क्षति पुगेको जनाइएको छ। प्रिमोर्स्क रूसको बाल्टिक क्षेत्रमा रहेको सबैभन्दा ठूलो तेल निर्यात टर्मिनल हो, जहाँबाट ॅयुराल्स’ कच्चा तेल विश्व बजारमा पठाइन्छ।
यो आक्रमण मार्च अन्त्यतिर प्रिमोर्स्क र उस्त–लुगा बन्दरगाहमा भएका श्रृंखलाबद्ध ड्रोन आक्रमणपछिको पछिल्लो घटना हो।
यसैबीच, युक्रेनका सशस्त्र बलका प्रमुख ओलेक्सान्द्र सिर्स्कीले हालै समुद्री बन्दरगाहहरूमा आक्रमण गर्नु रूसको अर्थतन्त्र कमजोर बनाउने रणनीतिक कदम भएको बताएका थिए।
यस घटनाले रूस–युक्रेन द्वन्द्व अझै चर्किँदै गएको संकेत दिएको छ भने ऊर्जा पूर्वाधारमा आक्रमण बढ्दै जाँदा विश्व ऊर्जा आपूर्तिमा समेत असर पर्ने चिन्ता व्यक्त गरिएको छ।
