वासिङ्टन । इरानविरुद्ध स्थलमार्गबाट हुने सैन्य अपरेसन आत्मघाती हुने भन्दै अमेरिकी स्थल सेना प्रमुख जर्ज र्यान्डीले राजीनामा दिएका छन् । राजीनामा राष्ट्रपति डोनाल्ड ट्रम्पको रवैयाका कारण आएको सैन्य अधिकारीहरूको दावी छ ।
इरानमाथि जारी युद्धको संवेदनशील घडीमा यस्तो निर्णय आउनुलाई विश्व राजनीति र अमेरिकी सैन्य इतिहासमा असामान्य मानिएको छ । अमेरिकी रक्षामन्त्री पेट हेगसेठका अनुसार अचानक जर्जलाई पदमुक्त गरिएको छ ।
सामाजिक सञ्जाल र केही वैकल्पिक प्लेटफर्महरूमा जर्जले ‘इरानविरुद्ध स्थलमार्गबाट हुने सैन्य अपरेसन आत्मघाती हुने’ अभिव्यक्ति दिएपछि राजीनामा मागिएको दावी गरिएको छ । उक्त भनाइ झण्डै २४ घण्टा बित्दासमेत आधिकारिक तवरबाट पुष्टि भैसकेको छैन ।
विश्लेषकहरू भन्छन्, ‘सेना प्रमुखको राजीनामा अमेरिकी सैन्य नेतृत्वभित्र इरानसँगको सम्भावित युद्धको स्वरूपबारे गहिरो मतभेद देखिन थालेको संकेत हो ।’ विशेषतः ‘ग्राउन्ड अपरेसन’ जस्तो जोखिमपूर्ण विकल्पमा सहमति नबनेका कारण इरान युद्धमा अमेरिकाको स्थिति कमजोर भइसकेको अर्थ लगाइएको छ ।
यसबीच, जर्जलाई हटाइनुमा रक्षामन्त्रीको ॅजियोनिस्ट प्रभाव’ परेको भन्ने दावीहरू पनि बाहिरिएका छन्। सबैभन्दा ठूलो कुरा सेना प्रमुखले अमेरिकी सरकारलाई स्थलमार्गबाट इरानमा गरिने आक्रमणमा मारिनसक्ने आफ्ना सैनिकको जिम्मेवारी आफूले लिन नसक्ने कडा जवाफ दिएपछि राजीनामा लिइएको धेरैको दावी छ ।
