जिउछ्वान, १७ चैत । चीनले सोमबार ‘लिजियान–२ वाइ–१’ नामक वाहक रकेट सफलतापूर्वक प्रक्षेपण गरेको छ । उक्त रकेटले तीनवटा उपग्रह बोकेको थियो ।
रकेट स्थानीय समयअनुसार बेलुका ७ बजे उत्तरपश्चिम चीनस्थित व्यावसायिक अन्तरिक्ष नवप्रवर्तन क्षेत्रमा रहेको प्रक्षेपण केन्द्रबाट उडान भरेको हो । प्रक्षेपण सफल भई सबै उपग्रहहरू निर्धारित कक्षमा स्थापना भएका छन् ।
उपग्रहहरूमध्ये छिङझोउ कार्गो अन्तरिक्ष यान परीक्षण उपकरण पनि समावेश रहेको छ, जसलाई चिनियाँ विज्ञान एकेडेमी अन्तर्गत माइक्रोस्याटेलाइट नवप्रवर्तन एकेडेमीले विकास गरेको हो । यस परीक्षण उडानमा २७ वटा परियोजना समावेश छन् र कुल तौल १.०२ टन रहेको छ । यसले २०० देखि ६०० किलोमिटरसम्मको उचाइमा कक्षीय परीक्षण गर्नेछ ।
यो प्रक्षेपण लिजियान–२ रकेटको पहिलो उडान हो । विकासकर्ताहरूका अनुसार यो ‘सामान्य बूस्टर कोर’ डिजाइन प्रयोग गर्ने चीनको पहिलो रकेट हो । यसको उचाइ ५३ मिटर, तौल ६२५ टन र थ्रस्ट क्षमता ७५३ टन रहेको छ । यसले ५०० किलोमिटर सूर्य–समकालिक कक्षमा ८ टन र तल्लो पृथ्वी कक्षमा १२ टनसम्म सामग्री लैजान सक्छ ।
लिजियान–२ परियोजनाका कमाण्डर याङ हाओलियाङका अनुसार यो प्रक्षेपण चीनको नयाँ पुस्ताको अन्तरिक्ष ढुवानी प्रणाली विकासमा महत्वपूर्ण उपलब्धि हो । यसले एक मात्र रकेट प्रणालीमा निर्भरता घटाउँदै बहु–रकेट प्रणालीमार्फत लचिलो र सुरक्षित सेवा उपलब्ध गराउने आधार तयार गरेको छ ।
उहाओलियाङले थप बताएअनुसार पुनः प्रयोग गर्न सकिने रकेट प्रविधिमा पनि काम भइरहेको छ । प्रारम्भिक परीक्षणहरू सफल भइसकेका छन् र यस वर्ष थप परीक्षण गर्ने योजना रहेको छ ।
विकासकर्ताहरूले भविष्यमा व्यावसायिक रकेटहरूको प्रयोग बढ्दै जाने र यसले लागत घटाउँदै कार्यक्षमता र सुरक्षा दुवैमा सुधार ल्याउने विश्वास व्यक्त गरेका छन् ।
