काठमाडौँ । क्यान्सरयोद्धा बिनु जिसीको असामयिक निधन भएसँगै नेकपा (मसाल) ले उहाँको निधनप्रति श्रद्धाञ्जली व्यक्त गरेको छ ।
महामन्त्री मोहनविक्रम सिंहको हस्ताक्षरमा २०८२ कात्तिक २० गते बिहीबार शोकवक्तव्य जारी गर्दै मसालले श्रद्धाञ्जली तथा शोकसन्तप्त परिवारप्रति समवेदना गरेको हो ।
यस्तो छ, शोकवक्तव्यको पूर्ण पाठ :
“कामरेड बिनु जिसीको आज दिउसो ३ बजे काठमाडौँ बालाजुको सिल्भरल्यान्ड अस्पतालमा मृत्यु भएको छ । नेकपा (मसाल) ले उहाँप्रति भावपूर्ण श्रद्धाञ्जली दिँदै उहाँको शोकसन्तप्त परिवार र सबै इष्टमित्रप्रति पनि हार्दिक समवेदना प्रकट गर्दछौँ ।
उहाँ क्यान्सर रोगबाट पीडित हुनुहुन्थ्यो । उहाँको जीवनको एउटा महत्त्वपूर्ण पक्ष के थियो भने उहाँले गत १८ वर्षदेखि त्यसका विरुद्ध बहादुरीपूर्वक सङ्घर्ष गर्दै आउनुभएको थियो । कडा क्यान्सर रोग लागेको अवस्थामा पनि त्यसका विरुद्ध सङ्घर्ष गर्दै १८ वर्षसम्म जीवित रहनु सामान्य कुरा होइन । उहाँमा भएको उच्च प्रकारको मनोबलका कारणले नै उहाँ १८ वर्षसम्म त्यसका विरुद्ध सफलतापूर्वक सङ्घर्ष गर्न सफल हुनुभएको थियो । त्यसका लागि हामीले उहाँलाई सम्मान गर्नुपर्दछ र बधाई पनि दिनुपर्दछ । अन्य सबै क्यान्सरपीडित मात्र होइन, सबै बिरामीले उहाँबाट प्रेरणा लिनुपर्दछ ।
उहाँको १४/१५ पटक अप्रेसन भएको थियो । सो क्रममा उहाँको शरीरका कैयौँ अङ्ग काटिएका थिए तैपनि आफ्नो जिन्दगीको अन्त्यसम्म उहाँले हिम्मत हार्नुभएको थिएन र सधैँ हंशमुख र जीवनप्रति आशावादी हुनुहुन्थ्यो ।
उहाँले खालि व्यक्तिगत रूपले मात्र यति लामो समयसम्म क्यान्सरका विरुद्ध लडेर विजय प्राप्त गर्नुभएको थिएन, अन्य क्यान्सरपीडित बिरामीलाई पनि लगातार उत्साह र प्रेरणा दिइरहनुहुन्थ्यो । उहाँ जीवनभरि नै त्यस प्रकारका कतिपय संस्थासित सम्बद्ध हुनुहुन्थ्यो । त्यसरी उहाँको मृत्युबाट सबै क्यान्सरपीडित बिरामीलाई पनि धेरै दु:ख पुगेको छ ।
क्यान्सर अहिले विश्वको नै एउटा गम्भीर समस्या बनेको छ । संसारभरिका वैज्ञानिकले त्यसका विरुद्ध औषधी निर्माणका लागि अथक प्रयत्न गरिरहेका छन् । गत कालमा कैयौँ असाध्य ठानिएका रोगका औषधी पत्ता लागेर त्यस प्रकारका रोग अब असाध्य रहेका छैनन् । हामीले आशा र विश्वास गर्दछौँ कि क्यान्सरको पनि छिट्टै औषधी पत्ता लाग्नेछ र भविष्यमा का. बिनुजस्ता व्यक्तिको मृत्यु हुनेछैन । अहिले का. बिनुको मृत्युका लागि दु:ख प्रकट गर्ने बेलामा हामीले त्योबाट मुक्तिको सुन्दर, उज्ज्वल र सुखद भविष्यको पनि आशा व्यक्त गर्दछौँ ।
अन्तमा का. बिनुप्रति उच्च श्रद्धाञ्जली प्रकट गर्दै उहाँका शोकसन्तप्त परिवार र सबै इष्टमित्रप्रति हार्दिक समवेदना व्यक्त गर्दछौँ ।”
गत १८ वर्षदेखि क्यान्सरयोद्धा बिनु प्रारम्भमा ब्रेस्ट क्यान्सरबाट पीडित हुनुहुन्थ्यो । पछि क्यान्सर उहाँको शरीरका अन्य भागमा फैलिएको थियो । उहाँको उपचार भारत र नेपालका विभिन्न अस्पतालमा उपचार भएको थियो ।
नेपाल क्यान्सर सर्भाइबर्स सोसाइटीको कोषाध्यक्षसमेत रहनुभएकी बिनुको परिवार नेकपा (मसाल) ३ नम्बर प्रदेश ब्युरोका प्रवक्ता तथा प्रगतिवादी साहित्यकार समीर सिंहकी श्रीमती हुनुहुन्छ ।
स्मृतिशेष बिनु प्रगतिशील लेखक सङ्घ काठमाडौँ जिल्ला समितिमा समेत रहेर काम गर्नुभएको थियो । साहित्यक्षेत्रमा समेत उहाँको सक्रियता रहेको थियो ।
उहाँको परिवारमा ससुरा मोहनविक्रम सिंह, सासू शान्ता सिंह र दुर्गा पौडेल, छोरा अभिदर्शन, देवरहरू विश्वमोहन र दिव्यमोहन हुनुहुन्छ ।
बिनु आजै साँझ पशुपति आर्यघाटमा दाहसंस्कार हुँदैछ ।
