वासिङटन । अमेरिकी राष्ट्रपति डोनाल्ड ट्रम्पको कठोर नीति र अधिनायकवादी व्यवहार विरुद्ध शनिबार देशभरै ‘नो किङ्ग्स’ नामक विशाल प्रदर्शन गरिएको छ ।
अमेरिकाका सबै ५० राज्यका सहरमा लाखौँ मानिस लोकतन्त्रको पक्षमा र राष्ट्रपति ट्रम्पको नीति विरुद्ध सडकमा उत्रिएका थिए ।
आयोजकका अनुसार न्युयोर्कदेखि लस एन्जलससम्म फैलिएको यो आन्दोलनमा करिब ७० लाखभन्दा बढी नागरिकले सहभागिता जनाएका थिए । फ्लोरिडास्थित ट्रम्पको निवासनजिक र अमेरिकी हार्टल्यान्डका साना सहरमा समेत विरोध प्रदर्शन भएका थिए ।
वासिङ्टनस्थित अमेरिकी क्यापिटल नजिकै हजारौँ प्रदर्शनकारीले ‘लोकतन्त्र यस्तो देखिन्छ’ भन्ने नारा लगाउँदै सरकारको दीर्घकालीन बन्द (सटडाउन) विरुद्ध पनि आक्रोश प्रकट गरेका थिए । रङ्गिन पोस्टरमा ‘लोकतन्त्रको रक्षा गरौँ’ भन्ने सन्देश झल्किन्थ्यो भने कतिपयले आप्रवासीमाथि दमन गर्ने अध्यागमन तथा भन्सार प्रवर्तन (आइसिई) निकायको अन्त्य गर्न माग गरेका थिए ।
न्युयोर्ककी ६९ वर्षीया सेवानिवृत्त कोलिन हफम्यानले आँसु झर्दै भन्नुभयो– ‘लोकतान्त्रिक देशको मृत्यु आफ्नै आँखाबाट हेर्नुपर्ने दिन आउनेछ भन्ने मैले कहिल्यै सोचेकी थिइनँ । हामी अहिले सङ्कटमा छौँ । यो शासनको क्रुरता र अधिनायकवादले हामीलाई घुँडा टेकाउन खोजिरहेको छ ।’
लस एन्जलसमा प्रदर्शनकारीले डाइपर लगाएको ट्रम्पको विशाल बेलुन आकाशमा उडाए । कतिपयले हालैका विश्वव्यापी विरोधमा प्रचलित ‘खोपडी लोगो’ अङ्कित झन्डा फहराएका थिए । ह्युस्टनमा ‘अज्ञानता विरुद्ध लडौँ, आप्रवासी विरुद्ध होइनौँ; भन्ने सन्देशले नागरिकको ध्यान खिचेको थियो ।
प्रदर्शन अधिकांश ठाउँमा शान्तिपूर्ण रहे पनि लस एन्जलसको डाउनटाउनमा केही भिड नियन्त्रणका क्रममा प्रहरीले गैरघातक गोली र अश्रुग्याँस प्रयोग गरेको लस एन्जलस टाइम्सले जनाएको छ । लस एन्जलस प्रहरीले कानुनी आदेशपछि प्रदर्शनकारीलाई तितरबितर गरियो भने पनि गिरफ्तारीबारे विवरण सार्वजनिक गरिएको थिएन ।
न्युयोर्कमा करिब एक लाखभन्दा बढी र वासिङ्टनमा आठदेखि १० हजारसम्म प्रदर्शनकारीको भिड अनुमान गरिएको थियो । आयोजकको उपस्थिति तथ्याङ्क स्वतन्त्र रूपमा पुष्टि हुन सकेको थिएन ।
राष्ट्रपति ट्रम्पले भने आफ्नो ट्रुथ सोसल प्लेटफर्ममार्फत प्रतिक्रिया दिँदै आफूलाई राजाको रूपमा चित्रण गर्ने एआईनिर्मित भिडियोको शृङ्खला सार्वजनिक गर्नुभयो । एउटामा उहाँलाई मुकुट लगाएर लडाकु जेट उडाउन र विरोधीलाई अपमानित गर्ने दृश्य देखाइएको थियो ।
उहाँका सहयोगीले पनि प्रदर्शनलाई ‘घृणा अमेरिका र्याली’ भन्दै व्यङ्ग्य गरेका थिए । सदनका अध्यक्ष माइक जोनसनले प्रदर्शनकारीलाई माक्र्सवादी, समाजवादी र हमास समर्थक वामपन्थीको मिश्रण भएको बताउनुभयो ।
यता प्रदर्शनकारीले ती आरोपलाई हास्यात्मक रूपमा खारेज गरे । वासिङ्टनमा सहभागी ६३ वर्षीया पाओलोले भन्नुभयो– ‘यदि यो घृणा हो भने ती आलोचक फेरि विद्यालय फर्किनुपर्छ ।’
अर्का प्रदर्शनकारी ३४ वर्षीय सफ्टवेयर इन्जिनियर टोनीले भन्नुभयो– ‘हामीमाथि दक्षिणपन्थीले घृणा गर्छन् तर हामी सत्यको पक्षमा अडिएका छौँ ।’
अमेरिकन सिभिल लिबर्टिज युनियनकी डेरड्रे सिफेलिङका अनुसार प्रदर्शनकारीको मुख्य सन्देश ‘हामी समानता र कानुनको देश हौँ’ भन्ने थियो । उहाँले भन्नुभयो– ‘हामी सबैका लागि न्याय, प्रक्रिया र लोकतन्त्रमा विश्वास गर्छौं । हामी चुप लाग्ने छैनौँ ।’
अविभाज्य परियोजनाका सहसंस्थापक लेह ग्रिनबर्गले ट्रम्प प्रशासनले डेमोक्रेटिक नेतृत्व भएका सहर लस एन्जलस, वासिङ्टन, सिकागो, पोर्टल्यान्ड र मेम्फिसमा नेसनल गार्ड पठाउने प्रयासको कडा आलोचना गर्नुभयो । उहाँका शब्दमा यो धम्की, भ्रम र डरद्वारा नागरिकलाई मौन पार्ने अधिनायकवादी शासनको पुरानो रणनीति हो ।
अमेरिकी क्यापिटल अगाडि बोल्दै प्रगतिशील सिनेटर बर्नी स्यान्डर्सले ट्रम्प शासनले लोकतन्त्रमा गम्भीर खतरा उत्पन्न गरिरहेको चेतावनी दिनुभयो ।
उहाँले भन्नुभयो– ‘हामीसँग यस्तो राष्ट्रपति छन्, जसले सबै शक्ति आफ्नो र आफ्नो निकट वर्गको हातमा केन्द्रित गर्न खोजिरहेका छन् ।”
१६ वर्षीय विद्यार्थी आइज्याक हार्डरले भन्नुभयो– ‘हाम्रो पुस्ताको भविष्य अन्धकारमय देखिन्छ । यो फासिस्ट बाटो हो र यसलाई रोक्नका लागि म आफ्नो हिस्साको योगदान गर्न चाहन्छु ।” (रासस/एएफपी)
