खलङ्गा । साल्ट ट्रेडिङ कर्पोरेसन शाखा कार्यालयले जिल्लामा पर्याप्त मात्रमा नुन रहेकोे जनाएको छ ।
सदरमुकाम खलङ्गास्थित डिपोमा अहिले करिब छ हजार क्विन्टल नुन मौज्दात रहेको कार्यालय प्रमुख नगेन्द्रबहादुर थापाले जानकारी दिनुभयो ।
कार्यालयका अनुसार चालु आर्थिक वर्षका लागि सदरमुकाम खलङ्गा बजारमा रहेको डिपोमा पाँच हजार पाँच सय क्विन्टल, सिँजा गाउँपालिकाको नराकोट डिपोमा एक हजार पाँच सय क्विन्टल र कनकासुन्दरी गाउँपालिकाको गुरुचौर डिपोमा एक हजार तीन सय क्विन्टल नुनको कोटा रहेको छ ।
उहाँले भन्नुभयो– ‘जिल्लामा नुनको अभाव रहेको छैन । जिल्लामा पर्याप्त मात्रमा नुन रहेकोे छ । दसैँको अवधिमा करिब पाँच सय ४६ क्विन्टल नुन बिक्री भएको छ । यहाँका आठओटै स्थानीय तहका वडाको सिफारिसको आधारमा नुन वितरण हुने गरेको छ । वडाको मागबमोजिम नुन वितरण भइराखेको छ ।’
बितेका वर्षमा जिल्लामा करिब पाँच हजार चार सय क्विन्टलको हारहारीमा कोटा हुने गरेको थियो । नुन उपभोक्तालाई पुर्याउन केही कठिन हुने गरेकोमा यस वर्षदेखि जिल्लाका लागि नुनको कोटा वृद्धि भएसँगै यहाँका उपझोक्तालाई सहज रूपमा नुन वितरण भइरहेको कार्यालय प्रमुख थापाले बताउनुभयो ।
सदरमुकामसहित तीनै डिपोका लागि बाँकी कोटा नुनको ढुवानी भइरहेको छ । सबैभन्दा बढी चन्दनाथ नगरपालिका, गुठीचौर, पातारासी र तातोपानी गाउँपालिकाका उपझोक्ताले नुन लिने गरेको कार्यालयले जनाएको छ ।
जिल्लाका स्थानीय तहले वडाबाटै नुन वितरण गरेपछि यहाँका स्थानीयवासीलाई सहज भएको छ भने स्थानीयवासी पनि औधी खुसी छन् । (रासस)
