काठमाडौं । रियल गोर्खा बचत तथा ऋण सहकारी संस्थाका अध्यक्ष हर्क बहादुर कठायत र सदस्य विनोद कुमार ओझालाई पक्राउ गरेको छ ।

काठमाडौंको तिनकुनेमा केन्द्रीय कार्यालय रहेको सो सहकारीले बचतकर्ताको १२ करोड रुपैयाँभन्दा बढी रकम हिनामिना गरेको प्रहरीले जनाएको छ ।

प्रहरीका अनुसार सहकारीका संचालक समितिका सदस्यहरूले निक्षेपकर्तालाई आर्कषक ब्याजदर दिन्छु भनि प्रलोभन देखाई सहकारी मुद्दती, निक्षेप, आवधिक बचत, सेयर तथा विभिन्न बचत खातामा जम्मा गर्न लगाएका थिए। मासिकरत्रैमासिकरवार्षिक रुपमा ब्याज पाउने र निर्धारित अवधि नाघेपछि निक्षेपको सम्पूर्ण साँवा, ब्याज फिर्ता पाउने विश्वासका साथ उक्त संस्थामा बचतकर्ताहरुले जम्मा गरेको रकमको साँवा, ब्याज फिर्ता नदिई पटक–पटक ताकेता गर्दा पनि फिर्ता दिएका थिएनन्।

त्यसपछि निक्षेपकर्ताहरुले आफ्नो रकम जोखिममा रहेको ठानी सम्बन्धित संस्थाका कर्मचारी तथा पदाधिकारीहरुलाई लामो समयदेखि ध्यानाकर्षण गराउँदा समेत नियमानुसार पाउनु पर्ने निक्षेप तथा सोको ब्याज रकम उपलब्ध गराईदिने तर्फ आवश्यक पहल नगरी संस्था नै बन्द गरेको प्रहरीको भनाई छ। सो सहकारीको जोरपाटी र भक्तपुरमा समेत शाखा कार्यालय सञ्चालनमा थिए ।

बचतकर्ताहरूले हालसम्म दिएको जाहेरी अनुसार १२ करोड ३५ लाख ४८ हजार २०२ रुपैयाँ ९२ पैसा बचत रकम अपचलन तथा हिनामिना भएको छ ।

फरार रहेका अध्यक्ष कठायत र सदस्य ओझालाई प्रहरीले पुस १८ गते पक्राउ गरी आवश्यक अनुसन्धान गरिरहेको जनाएको छ।