पोखरा । व्यावसायिक कृषिमा लागेका किसानलाई पोखरा महानगरपालिकाले ५० प्रतिशत अनुदानमा कृषिऔजार र उपकरण प्रदान गरेको छ ।
पोखरा प्रदर्शनी केन्द्रमा २०८० पुस २० शुक्रबारदेखि सुरु भएको प्रथम प्रदेशस्तरीय कृषि यान्त्रिकीकरण प्रदर्शनीका अवसरमा महानगरले सो अनुदान वितरण गरेको हो ।
चालु आवमा अनुदानका लागि छनौट भएका कृषिसमूह, सहकारी तथा फार्मले प्रदर्शनी कक्षबाटै आफूलाई आवश्यक परेका कृषि उपकरण तथा प्रविधि खरिद गर्ने प्रबन्ध मिलाइएको महानगरको कृषि महाशाखा प्रमुख मनोहर कडरियाले जानकारी दिनुभयो ।
‘देशविदेशका कम्पनीले आफ्नो उत्पादनलाई प्रदर्शनीमा राखेका छन्, महानगरभित्रका किसानले रोजी रोजी अनुदानको कृषियन्त्र किन्न सक्नुहुन्छ’ उहाँले भन्नुभयो– “बिलभरपाइको आधारमा ५० प्रतिशत रकम किसानलाई उपलब्ध गराउँछौँ ।’
महाशाखा प्रमुख कडरियाका अनुसार किसानलाई एक सय १६ मिनिटिलर हलो, तीन सय ८५ टनेल प्लास्टिक, मल्चिङ प्रविधि ९१, थोपा सिँचाइ ३६, स्प्रेयर एक सय २२, असिना छेक्ने जाली ८५ र ५८ मौरीघार अनुदानमा उपलब्ध गराइएको छ ।
महानगरले वडा तहमा कृषि सञ्जालमार्फत् प्रदान गरिने कृषिऔजार तथा उपकरण पनि सञ्जालले चाहेको खण्डमा प्रदर्शनीस्थलबाटै वितरण गर्ने योजना बनाएको छ । व्यावसायिक कृषिपकेटको छुट्टै कार्यक्रममार्फत एक सय नौ कृषिसमूह, सहकारी र फार्म अनुदानका लागि छानिएको महानगरले जनाएको छ ।
महाशाखा प्रमुख कडरियाले महानगरले बर्सेनि कृषिको यान्त्रिकीकरणका लागि रु ८० लाखभन्दा बढी अनुदान रकम खर्च गर्ने गरेको बताउनुभयो । पछिल्लो एक दसकयता किसानले कृषि उत्पादनदेखि प्रशोधनका काममा नयाँ नयाँ कृषियन्त्र र उपकरणको प्रयोग बढाउँदै गएको उहाँको भनाइ छ । (रासस)
