काठमाडौँ । आगामी पुस २० देखि २२ गतेसम्म राजधानीको भृकुटीमण्डपमा फर्निचरसम्बन्धी अन्तर्राष्ट्रिय प्रदर्शनी हुने भएको छ ।
मिडिया स्पेस सोलुसन्स प्रालि र फ्युचरेक्स ट्रेड फेयर एन्ड इभेन्टस् प्रालिले संयुक्त रूपमा उक्त प्रदर्शनीको आयोजन गरेका हुन् ।
प्रदर्शनीमा फर्निचर, प्लाइवुड, ल्यामिनेट हार्डवेयर, काष्ठसम्बन्धी मेसिनरी तथा औजार, फर्निसिङ, म्याट्रेस, कच्चा पदार्थ तथा उत्पादनसम्बन्धी सामग्री उपलब्ध हुने आयोजकले जनाएको छ ।
प्रदर्शनीमा स्वदेशी तथा विदेशी ख्यातिप्राप्त ब्रान्डका सयभन्दा बढी स्टल रहने छन् । फनिर्चर, प्लाइउड तथा काठ औजारका कम्पनी, ल्यामिनेट, विभिन्न कम्पनीका डिलर, सबडिलर र विक्रेताले काठ व्यवसायसँग सम्बन्धित उत्पादनको बारेमा प्रदर्शनीमा जानकारी गराइने भएको छ ।
फर्निचर क्षेत्रका नयाँ नयाँ प्रविधिबारे जानकारी गराउन गत आठ वर्षदेखि यस्तो प्रदर्शनीको आयोजना हुँदै आएको आयोजकले दाबी गरेको छ ।
प्रदर्शनीमा सहयोगी संस्थाको भूमिकामा सोसाइटी अफ नेप्लिज आर्किटेक्ट, इन्टेरियर डिजाइनर एस्सोसियेसन नेपाल, सामुदायिक वन उपभोगता महासङ्घ, नेपाल वनपैदावार उद्योग व्यवसायी महासङ्घ तथा नेपाल प्लाइउड उत्पादक सङ्घ रहेका छन भने ल्यानयार्ड पार्टनरको रूपमा फर्निचर हब रहेको छ ।
त्यस्तै, यस प्रदर्शनीमा घर बनाउन चाहने व्यक्ति, आम नागरिकबाहेक नेपालका दिग्गज आर्किटेक्ट, इन्जिनियर तथा इन्टिरियर डिजाइनरको पनि सहभागिता रहने बताइएको छ ।
