काठमाडौं । नेपाल विद्युत प्राधिकरणले अर्ब रुपैयाँ भन्दा बढी बक्यौता रहेका उद्योगको लाइन काट्न थालेको छ ।
शुक्रबार चारवटा सिमेन्ट उद्योगको लाइन काटेको छ। जगदम्बा, रिलायन्स, घोराही र अर्घाखाँची सिमेन्ट उद्योगको आपूर्ती रोकिएको हो ।
जसमा जगदम्बाको १ अर्ब १४ करोड, रिलायन्स १ अर्ब ९४ करोड, घोराही १ अर्ब ३६ करोड र अर्घाखाँची सिमेन्ट उद्योगको १ अर्ब ३० करोड बक्यौता रहेको प्राधिकरणले जनाएको छ।
डेडिकेटेड फिडर र ट्रंक लाइनको बक्यौतालाई लिएर व्यवसायी र प्राधिकरणबीच लामो समयदेखिको विवाद छ।
२०७२ सालदेखि उद्योगीहरूले ट्रंक र डेडिकेटेडलाइनको सुविधा लिन थालेका थिए।
देशमा ऊर्जा संकटका बेला दैनिक १८ घण्टासम्म लोडसेडिङ खेपिरहेका बेला केही उद्योगले यो सुविधा पाएका थिए।
त्यसबेलादेखिको विद्युत महसुल भने ती उद्योगहरूले अहिलेसम्म प्राधिकरणलाई तिरेका छैनन्। यस्तो बक्यौता २५ अर्ब रुपैयाँभन्दा बढी पुगेको प्राधिकरणको हिसाबमा छ। यसमा करिब २० अर्ब साँवा र बाँकी हर्जना रहेको छ।
५८ वटा उद्योगले बक्यौता तिर्न बाँकी छ।
गत भदौमा प्रधानमन्त्री पुष्पकमल दाहालले प्राधिकरणका कार्यकारी निर्देशक कुलमान घिसिङलाई डेडिकेटेड लाइन र ट्रंकलाइनवापतको शुल्क उठाउन रोकेका थिए। उनले अहिले बक्यौता नतिर्ने उद्योगको लाइन काट्न निर्देशन दिएका हुन् ।
