साम्राज्यवादविरुद्ध ‘मेची-महाकाली अभियान’को टोली बारा र बर्दियामा

शुक्रबार, जेठ ०५, २०८० मा प्रकाशित

काठमाडौं । राष्ट्रिय जनमोर्चाले सञ्चालन गरेको ‘अमेरिकी साम्राज्यवादविरुद्ध मेची महाकाली अभियान’ का दुई टोली बारा र बर्दिया पुगेका छन् ।

बागलुङबाट अघि बढेको टोली आज (शुक्रबार) बारा पुगेको हो । सो टोलीले आज बाराको सिमरामा कार्यक्रम गर्दैछ भने पर्साको बनियानमा समेत विरोध सभा गर्ने कार्यक्रम रहेको टोलीमा संलग्न अखिल (छैठौं) का उपाध्यक्ष गणेश अधिकारीले जानकारी दिनुभयो ।

यसअघि सो टोलीले हिजो हेटौँडामा विरोध कार्यक्रम आयोजना गरेको थियो । हेटौँडामा साम्राज्यवादविरुद्ध पर्चा वितरण गर्नुका साथै सांस्कृतिक कार्यक्रम गरिएको अधिकारीले बताउनुभयो ।

पूर्वी टोलीमा राजमो केन्द्रीय सचिव हिमलाल पुरी, युगदर्शनका व्यवस्थापक हरिकान्त शर्मा, राजमो नेता चन्द्र सापकोटा, अखिल (छैठौं) का उपाध्यक्ष गणेश अधिकारी र केन्द्रीय सदस्य सन्ध्या भट्टराईलगायत सहभागी रहनुभएको छ ।

यता, कञ्चनपुरबाट अघि बढेको पश्चिमी टोलीले आज बर्दियाको गुलरिया र बाँकेको खजुरामा विरोध सभाको आयोजना गर्दैछ ।

यसअघि हिजो सो टोलीले डोटीमा पत्रकार सम्मेलन गर्नुका साथै डडेल्धुरामा विरोध सभा गरेको थियो । डोटीमा आयोजित पत्रकार सम्मेलनमा पत्रकारहरुको जिज्ञासाको राजमो महासचिव मनोज भट्टले स्पष्ट पार्नुभएको थियो ।

यस्तै, डडेल्धुरामा आयोजित सभामा अखिल नेपाल युवक संघका अध्यक्ष कृष्णराज पाण्डे, राजमो सुदूरपश्चिम प्रदेश सल्लाहकार बिर्खराज पन्त, प्रदेश सदस्य उद्धवसिंह ऐर र अखिल (छैठौं) का केन्द्रीय सदस्य महेश शर्माले सम्बोधन गर्नुभएको थियो भने सञ्चालन राजमो डोटीका सदस्य मानबहादुर खड्काले गर्नुभएको थियो ।

राष्ट्रिय जनमोर्चाले अमेरिकी साम्राज्यवादविरुद्ध १६ दिने मेची महाकाली अभियान सञ्चालन गरेको हो ।

‘गणतन्त्र र राष्ट्रियताको रक्षा गरौँ, संघीयताको विरोध गरौँ, अमेरिकी साम्राज्यवाद विरुद्ध मेची–महाकाली अभियान सफल पारौँ’ भन्ने नारासहित महेन्द्रनगर र बागलुङबाट एकै साथ सुरुवात भएको सो अभियान देशका विभिन्न भागमा कार्यक्रम गर्दै जेठ १५ गते बुटवल र काठमाडौंमा समापन गरिने राजमो केन्द्रीय कार्यालयले जनाएको छ ।