काठमाडौं । राष्ट्रिय जनमोर्चाले देशको केन्द्र राजधानी रहेको जिल्ला काठमाडौंमा बृहत संगठन निर्माण गर्ने योजना अघि सारेको छ । शनिबार र्भकुटीमण्डपमा सम्पन्न राजमो काठमाडौंको जिल्ला भेलाले काठमाडौं महानगरसहित १० वटै नगरपालिकामा संगठन निर्माणको योजना तयार पारेको हो ।
कार्यक्रमलाई सम्बोधन गर्दै अध्यक्ष चित्रबहादुर केसीले देश र जनताको हितका लागि पहिलो सर्त राजनीति सही हुनुपर्ने बताउनुभयो । त्यसका लागि सही सिद्धान्त र सिद्धान्तलाई कार्यान्वयन गर्ने उपयुक्त संगठन हुनुपर्ने केसीले बताउनुभयो । अध्यक्ष केसीले मार्क्सको पालमा सही सिद्धान्त भएपनि सही संगठन नभएको उल्लेख गर्दै लेनिनले सिद्धान्त र संगठनको सन्तुलन मिलाएर अघि बढेको प्रशंग कोट्याउनुभयो ।
संगठन ठुलो भएर मात्रै नहुने नेपालकै सत्तारुढ नेकपा र नेपाली कांग्रेस गतिलो उदाहरण भएको अध्यक्ष केसीले बताउनुभयो । ‘हाम्रो राजनीति कहाँ छ?’ केसीले भन्नुभयो, ‘भ्रष्टाचारका आरोपीलाई छोड्नुपर्यो भनेर संसद अबरुद्ध भइरहेको छ । नेकपामा पनि अनुशासनको त्यस्तै हरिविजोग छ ।’
केसीले राष्ट्रिय जनमोर्चाको उच्च सैद्धान्ति राजनीतिक चरित्रका कारण जनतामा शीर ठाडो गरेर जान सक्ने अवस्था रहेको बताउनुभयो । सिद्धान्त र राजनीति सही भएपनि संगठनको अवस्था कमजोर भएका कारण पार्टीले चाहे अनुसार देश र जनताको अवस्थामा परिवर्तन गर्न नसकेको स्वीकार गर्दै केसीले अब संगठन बलियो बनाउन हरेक कार्यकर्ताले ध्यान दिनुपर्ने बताउनुभयो ।
कार्यक्रममा १० वटै नगरपालिकाका प्रतिनिधिहरुले आ–आफनो पालिकामा संगठन निर्माण योजनाको खाका प्रस्तुत गरेका थिए । जसमा वडाहरुमा सम्पर्क स्थापित गर्ने, सदस्यता वितरण र समितिहरु निर्माण गर्ने, विभिन्न जिल्लाबाट काठमाडौं आएर बसोबास गरेका पार्टी समर्थकहरुलाई गोलबन्द गर्ने, स्थानीयस्तरमा विकास निर्माण योजनामा जनताको नेतृत्व गर्ने लगायत उल्लेख छ ।
राजमो काठमाडौंले फागुन १ गते संगठनात्मक अभियानको उत्घाटन चन्द्रागिरि नगरपालिकाको सतुंगलमा गर्ने र समापन फागुन ३० गते शंखरापुरमा समापन गर्ने कार्यक्रम सार्वजनिक गरेको छ ।
कार्यक्रममा काठमाडौं महानगरपालिबाट ऋतु केसी, टोखा नगरपालिकाबाट अजिता ढकाल, तारकेश्वर नगरपालिकाबाट रामबाबु फुयाल, बूढानीलकण्ठ नगरपालिकाबाट छवि खनाल, गोकर्णेश्वर, कागेश्वरी मनोहरा र शंखरापुर तीनवटा नगरपालिकाको संयुक्त रुपमा राजेन्द्र पुडासैनी, कीर्तिपुर र दक्षिणकाली नगरपालिकाको भरतमणी भण्डारी र चन्द्रागिरि नगरपालिकाको रोसन दानीले आ–आफ्नो नगरसमितिले तय गरेका योजना प्रस्तुत गर्नुभएको थियो ।
भेलामा विद्यानाथ अधिकारी, जगत रेग्मी, लक्ष्मी केसी, अमर बहादुर थापा, हेमराज आश्रम, पदम रोकालगायतले थप सुझाव दिनुभएको थियो ।
राजमो काठमाडौंका अध्यक्ष झविन्द्र वेलवासेको अध्यक्षता तथा लक्ष्मणदेव पाण्डेको सञ्चालनमा सम्पन्न कार्यक्रमा राजमो नेता आनन्द शर्मा, राजमोका केन्द्रीय सदस्यहरु लालबहादुर थापा, घनश्याम न्यौपाने, लक्ष्मी केसी, कल्याणी श्रेष्ठ, अखिल नेपाल कानुन व्यवसायी संघका अध्यक्ष पदम रोका, नेकपा (मसाल) बागमती प्रदेशका प्रवक्ता समीर सिंह, काठमाडौं जिल्ला प्रवक्ता जगत रेग्मी, जनजाति सम्मेलनका अध्यक्ष निमबहादुर बुढा, उद्योग व्यापार संघका महासचिव आरबी फुयाल, रक्तिमका केन्द्रीयस सल्लाहकार मधु क्षेत्री, महिला संघका केन्द्रीय सदस्य कमला पौडेल, किसान महासंघका जिल्ला अध्यक्ष केबी घलेलगायत नेताहरुको आतिथ्यता रहेको थियो ।
