सागर केसी, केन्द्रीय सदस्य राष्ट्रिय जनमोर्चा तथा अर्घाखाँची प्रदेशसभा ‘क’ का उम्मेदवार
० वाम–लोकतान्त्रिक गठबन्धन बनाउनुको कारण के होला ?
– २०७७ पुस ५ गते केपी शर्मा ओलीद्वारा देशमा प्रतिगमन भएको थियो । त्यसले गर्दा गणतन्त्र र धर्म निरपेक्षता जस्ता जनआन्दोलनका उपलब्धि धरापमा परेका थिए । त्यसको रक्षा गर्दै देशलाई अग्रगमनको दिशातर्फ लैजान यो गठबन्धनको आवश्यकता प¥यो । ओली नेतृत्वको एमालेबाट अहिले पनि प्रतिगामी खतरा यथावत रहेकाले त्यसलाई परास्त नगरेसम्म गत जनआन्दोलनका उपलब्धिको रक्षा हुन नसक्ने अवस्था अहिले पनि विद्यमान छ । यस सन्दर्भमा केन्द्रीय स्तरबाट नै वाम–लोकतान्त्रिक गठबन्धन बनेको थियो । सम्पूर्ण देशको यो राजनीतिक आवश्यकतालाई स्वीकार गरेर जिल्लास्तरमा पनि हामीले गठबन्धन गरेर अगाडि बढेका हौँ । गठबन्धनका उम्मेदवारको जितको कुरा त छँदै छ, त्योभन्दा पनि सविधानको रक्षा अर्थात् गणतन्त्र र धर्म निरपेक्षताको रक्षाका लागि यो गठबन्धन बनेको हो ।
० राष्ट्रिय जनमोर्चा सङ्घीयता विरोधी पार्टीको रूपमा परिचित छ । सङ्घीयताको मूल मर्मअनुसार देशमा प्रदेशसभाको संरचना बनेको छ । अनि, तपाईंको उम्मेदवारी पनि प्रदेशमै छ । यो अलि सुहाएन कि ?
– नेपालको सन्दर्भमा सङ्घीयता बेठिक छ भन्ने हाम्रो विचार अहिले पनि यथावत छ । हामीले जिते संसद्बाट, हारे सडकबाट, संसद्मा हाम्रो सङ्ख्या जति भए पनि सङ्घीयताको विरोधमा हामीले आवाज उठाउने नै छौँ । गत कालमा हाम्रा जनप्रतिधिहरूले यस्तै गरेका थिए ।
अर्कोतिर, हामीले संसदीय व्यवस्थाको भण्डाफोर गर्न चुनावमा भाग लिएका हौँ, यो संसदीय व्यवस्था वा सङ्घीयतालाई समर्थन गरेर चुनावमा भाग लिएका होइनौँ । यस सन्दर्भमा २०४७ सालको सन्दर्भ स्मरण गर्नु उचित हुने छ । त्यतिखेर संविधान सभाको चुनाव नगरिकन संविधान सुझाव आयोगबाट संविधान बनाएकाले २०४७ सालको संविधानलाई हामीले कालो संविधान बताएका थियौँ । २०४८ सालको आम निर्वाचनमा यही विषयलाई लिएर नेकपा (मसाल) ले बहिष्कार गरेको थियो तर त्यसपछिका चुनावमा यो विरोधलाई सुरक्षित राख्दै हामीले त्यसलाई उपयोग गरेका थियौँ । देश, राजनीतिक पार्टी र जनताले अन्ततः हाम्रो राजनीति स्वीकार गरे । फलस्वरूप देशमा संविधान सभाको चुनावद्वारा नै संविधान बन्यो ।
यस प्रकार विद्यमान व्यवस्थाप्रतिको विरोध र भण्डाफोर गर्न चुनावको उपयोग गरिएकाले प्रदेशसभामा मेरो उम्मेदवारी सुहाउने/नसुहाउने विषयभन्दा पनि राजनीतिक विषय बनेको छ । त्यसलाई त्यही रूपमा बुझिनुपर्दछ ।
० अर्घाखाँचीको प्रदेशसभा ‘क’ मा तपाईंका उम्मेदवारी किन आवश्यक ठानियो ?
– गत चुनावमा यस क्षेत्रबाट जितेर गएका जनप्रतिनिधिले जिल्लाबासीको हितमा काम गर्न सकेनन् भन्ने गुनासो जताततै छ । त्यस्तै, उनीहरूले स्वच्छ छवि र निष्पक्ष भूमिका निर्वाह गर्न सकेनन् भन्ने टिप्पणी हामीले सुनेकै छौँ । जिल्लाभित्र यो क्षेत्रको विकासका लागि नयाँ सोचका साथ अगाडि बढ्नुपर्ने आवश्यकता खड्किएको छ । यसरी जान सकियो भने मात्र जिल्लाको विकास र समृद्धिका ढोका खुल्छन् भन्ने लाग्दछ । त्यसका लागि राष्ट्रिय जनमोर्चाको तर्फबाट हामीले जिम्मेवारी लिनुपर्छ भन्ने मान्यता राख्दै मैले गठबन्धनको तर्फबाट साझा उम्मेदवारी दिएको हुँ ।
० तपाईंले प्रदेशसभाको चुनाव जित्ने ठोस आधार के ठान्नुभएको छ ?
– मैले राजनीति अहिले चुनावको मुखमा आएर गरेको होइन । गत पाँच दसकदेखि नेकपा (मसाल) र राष्ट्रिय जनमोर्चाको मातहतमा रही समाजका लागि काम गरिरहेको छु । हाम्रो पार्टीद्वारा देश र जनताको परिवर्तनमा खेलेको महŒवपूर्ण भूमिकामा मेरो पनि संलग्नता छ । अर्घाखाँचीमा रहेर यहाँका जनताको दुःखमा मैले पनि साथ दिएको छु । उनीहरूसित मेरो घनिष्ट सम्बन्ध रहेको छ । जिल्ला तथा स्थानीय स्तरका मुद्दामामिला मिलाउन वा जिल्लाको विकासका लागि म प्रत्यक्ष रूपमा संलग्न रहेको सबैलाई जानकारी छ नै । जिल्लाका सबै तह र तप्काका आदरणीय मतदाताले यो कुरा बुझ्नुभएका कारण मप्रति कसैको नकारात्मक भावना नभएको मैले महसुस गरेको छु । स्वयम् मेरो प्रतिद्वन्द्वी उम्मेदवार चेतनारायण आचार्यले समेत मेरो जितप्रति सकारात्मक भाव प्रकट गर्नुभएकाले यसपटक मैले जित्नेमा म विश्वस्त छु ।
० चुनावको प्रचार प्रसारको अभियान कसरी अगाडि बढिरहेको छ ?
– हामी वाम–लोकतान्त्रिक गठबन्धनको चुनावी कार्यक्रमअनुसार अघि बढिरहेका छौँ । गठबन्धनका दलको संयुक्त बैठक बसेर चुनाव प्रचारका कार्यक्रम बनेका छन् र त्यसलाई कार्यान्वयन गरिएको छ । पहिलो चरणमा आम मतदाता तथा राजनीतिक दलका नेता–कार्यकर्तासित भेटघाट सम्पन्न भइसकेका छन् । त्यस क्रममा हामी अर्घाखाँचीबाट बाहिर रहनुभएका जनतासित पनि भेटघाट गरिरहेका छौँ । दोस्रो चरणमा हामी अझै मसिनो गरी जनतामाझ गइरहेका छौँ । त्यस क्रममा खासगरी घरदैलो, भेटघाट, अन्तरक्रिया, सभा जस्ता कार्यक्रम घनीभूत रूपमा सम्पन्न भइरहेका छन् ।
० चुनाव प्रचारको क्रममा जनतामाझ हिँडदा तपाईंले के कस्ता मुद्दा लिएर जानुभएको छ ?
– जनताका समस्या गम्भीर छन् र तिनीहरूको सङ्ख्या धेरै छ । त्यसकारण जनतामाझ जानेका लागि मुद्दाको कमी कहिल्यै हुँदैन । चुनावको सन्दर्भमा त यो कुरा झनै बढी लागु हुन्छ । देशमा महङ्गी, भ्रष्टाचार, अनियमितता छ । यसलाई रोक्नुछ । विकास निर्माण कार्यमा भएका अनियमितता रोकेर त्यसमा पारदर्शिता ल्याउनुछ । कृषिलाई आधुनिकीकरण गरेर व्यवसायिक र आयमूलक तरिकाबाट अगाडि बढाउनुछ । जिल्लामा पर्यटनको विकास गर्नुछ । सुपा–देउरालीदेखि सन्धिखर्क, अर्घा, बामरुक, नर्सिङथान, बल्कोटलगायतका ठाउँलाई पर्यटकीय क्षेत्रको रूपमा विकास गर्नुछ ।
शैक्षिक गुणस्तर वृद्धि गरी व्यावसायिक शिक्षाप्राप्तिको लागि विशेष ध्यान दिनुछ । अस्पतालको अवस्था नाजुक छ । यसको स्तरोन्नतिमा ध्यान दिनुछ । सामान्य बिरामी हुँदा पनि बुटवल जानुपर्ने अवस्थाको अन्त्य गर्नुछ । करिब ५० प्रतिशत रोगको उपचार जिल्लाबाट हुन सक्ने व्यवस्था मिलाउनुपर्छ ।
जिल्लामा यस्ता धेरै कामहरू गर्नुपर्ने छन् । भोलि निर्वाचित भएर आउँदासाथ ती समस्याको समाधान कसरी गर्न सकिन्छ भन्ने विषयमा जिल्लाभित्र र जिल्लाबाहिर रहनुभएका आम जनतताका साथै, सरोकारवाला विज्ञ–विशेषज्ञ, विद्धान, बुद्धिजीवीसँग छलफल गरेर हामीले विकास निर्माणको कामलाई तीव्र रूप प्रदान गर्ने छौँ ।
० तपाईंले जितेपछि यस क्षेत्रका मतदाताले गर्नुपर्ने आशा के होलान् ?
– अघिल्लो प्रश्नको जवामा यसबारे मैले भनिसकेको छु । हामीले जनतालाई झुटा आश्वासन बाँडेका छैनौँ । जितेपछि सम्बन्धित स्थान र तहतप्काका समस्याको प्रकृतिअनुसार सल्लाह गरेर काम गर्ने छौँ । त्यस क्रममा जनताको माग र आवश्यकताअनुसार कहाँ के गर्नुपर्छ ? त्यसअनुसार योजना बनाएर काम गर्ने छौँ ।
० अन्त्यमा भन्नुपर्ने केही छन् कि ?
– मेरो विचार व्यक्त गर्ने अवसर दिनुभएको यस मिडियालाई आभार प्रकट गर्न चाहन्छु । मङ्सिर ४ गतेको निर्वाचनमा अग्रगमन पक्षधर वाम–लोकतान्त्रिक गठबन्धनका उम्मेदवारलाई आफ्नो अमूल्य मतदान गरेर विजय गराउन विनम्र अनुरोध गर्दछु ।
(प्रस्तुति : देवेन्द्र कुँवरको सहयोगमा प्रकाश थापामगर)
