काठमाडौं । कोरोना भाइरसको संक्रमण बढ्दै गएपछि चीनको स्वशासित क्षेत्र तिब्बतमा लकडाउन गरिएको छ । यसले गर्दा नेपालको उत्तरी सिमानाका ठप्प हुन पुगेका छन् ।
नाका बन्द हुँदा दशैँका लागि सामान लिएर आएका कन्टेनर सिमा क्षेत्रमा रोकिएका छन् ।
ल्हासास्थित नेपाली महावाणिज्यदूतावासले नाकाहरूमा देखिएको अवरोध तत्काल खुल्ने सम्भावना कम रहेको जनाएको छ । महावाणिज्य दूतावासले लकडाउन र सिमानाकामा भएको अवरोधबारे सरकारलाई जानकारी गराएको छ ।
नेपाली महावाणिज्यदूत जिम्सन रुम्दाली राईद्वारा जारी विज्ञप्तिमा भनिएको छ, ‘लकडाउन जारी भएको बखत पनि कोभिड प्रोटोकल पालना गर्दै ट्रक ढुवानी गर्ने व्यवस्थाका लागि अनुरोध गरिएको छ । तर हाल कोभिड सङ्क्रमण बढ्दो रहेको र ल्हासा, सिगात्से, न्यालम, केरुङ आदि स्थानमा पूर्ण रूपमा बन्दाबन्दी रहेकाले नाका तत्कालै खुल्ने सम्भावना कम देखिन्छ ।’
यसअघि व्यवसायीहरूले दशैँसँग जोडिएका मालसामानसहित करिब २०० कन्टेनर सीमापार नेपाल प्रवेशका लागि अनुमति कुरिरहेको बताएका थिए ।
विक्रम सम्वत् २०७२ साल वैशाखमा गएको विनाशकारी भूकम्पका कारण सुरुमा तातोपानी नाकाको व्यापार ठप्प भएको थियो ।
त्यसयता उक्त नाका पुन सञ्चालनमा ल्याउने प्रयासले पूर्ण रूपमा गति नलिँदै कोरोनाभाइरसको महामारीका कारण त्यो र रसुवागढी नाका दुवैबाट हुने गतिविधि प्रभावित भएका छन्।
कोरोनाभाइरसको महामारी बढ्दै गएको र त्यसका कारण आफूले लकडाउनसम्म गर्नुपरेको भन्दै चीनले गएको साउन २५ गते यता नाकाहरूबाट सामान पठाइरहेको छैन । नाका अवरुद्ध हुनु अघिसम्म निश्चित सङ्ख्यामा मालवाहक कन्टेनरहरूलाई नेपाल प्रवेश दिइरहेका थिए।
