काठमाडौं । नेपाल सरकारले गत आर्थिक वर्षमा आम्दानी भन्दा १ खर्ब ६२ अर्ब रुपैयाँ बढी खर्च गरेको छ । जसमा चालु खर्चको तुलनामा विकास खर्च निकै कम छ ।
आर्थिक वर्ष २०७८/७९ मा सरकारले कुल ११ खर्ब ३४ अर्ब रुपैयाँ आम्दानी गर्दा १२ खर्ब ९६ अर्ब रुपैयाँ खर्च गरेको छ । त्यसमा चालु खर्च ९ खर्ब ६१ करोड रुपैयाँ रहेको छ भने पूँजीगत खर्च २ खर्ब १६ अर्ब रुपैयाँ छ।
सरकारले ९० प्रतिशत कर उठाउँदा ५७ प्रतिशत मात्रै विकास खर्च गरेको छ । अघिल्लो आर्थिक वर्षमा सरकारको विकास खर्च एकदमै निराशाजनक देखिएको हो।
सरकारले एक वर्षमा लक्ष्यको ७९.३९ प्रतिशत कुल खर्च हुँदा चालुतर्फ ९०.२५ प्रतिशत र पूँजीगततर्फ ५७.२३ प्रतिशत खर्च भएको छ। वित्तिय तर्फ भने १ खर्ब ८९ अर्ब रुपैयाँ लक्ष्य राखिएकोमा १ खर्ब १८ अर्ब रुपैयाँ खर्च भएको छ।
सरकारले आर्थिक वर्ष २०७८/७९ सकिँदा राजश्व ९०.४६ प्रतिशतले उठाएको छ। सरकारले १ वर्षमा ११ खर्ब ८० अर्ब रुपैयाँको लक्ष्य राख्दा १० खर्ब ६७ अर्ब रुपैयाँ राजश्व संकलन गरेको छ।
जसमा राजश्व ९ खर्ब ८४ अर्ब अर्थात ९२।१५ प्रतिशत रहेको छ भने गैरकर राजश्व ८३ अर्ब रुपैयाँ उठाएको छ। सरकारको राजश्व लक्ष्य भन्दा करिब १ खर्ब रुपैयाँले कमी हो।
गत आर्थिक वर्षमा ५९ अर्ब ९१ करोड अनुदान उठाउने लक्ष्य राखेपनि त्यसको ३०.५३ प्रतिशत अर्थात १८ अर्ब २९ करोड रुपैयाँ अनुदान प्राप्त गरेको छ।
