फ्रिटाउन । सेरालिओनमा तीन दिने राष्ट्रिय शोक घोषणा गरिएको छ । राष्ट्रपति जुलिउस माडा बायोले तीन दिने शोकको घोषणा गर्नुभएको हो ।
यही सोमबार, मङ्गलबार र बुधबार देशभरि शोक मनाइने भएको छ । गत शनिवार इन्धन बोकेको ट्याङ्कर दुर्घटना हुँदा १०८ जनाको मृत्यु भएकाले राष्ट्रिय शोक मनाइने भएको हो । शोकको बेलामा कुनै औपचारिक र रमाइला कार्यक्रम नगरिने अधिकारीले जनाएका छन् ।
राष्ट्रपति बायोले अस्पतालमा उपचार गराइरहेका घाइतेलाई समेत भेटेर उपचारको अवस्थाका बारेमा जानकारी लिनुभएको छ ।
अस्पतालमा उपचार भइरहेकामध्ये अधिकांशको शरीरका धेरै भाग जलेका छन् । उहाँले घटनाका बारेमा निस्पक्ष छानबिन गरी दोषीलाइ कारबाही गर्ने प्रतिबद्धतासमेत जनाउनुभएको राष्ट्रपतिको कार्यालयले जनाएको छ ।
‘हामीले यो दुर्भाग्यपूर्ण घटनाबाट सिक्नुपर्दछ, आगामी दिनमा यस्तो घटना हुन नदिनका लागि अपनाउनुपर्ने उपाय अपनाउनुपर्दछ’ उहाँले भन्नुभयो । अर्को एउटा सवारी साधनसँग ट्याङ्कर ठोक्किएपछि आगलागी भएको र ठुलो मानवीय क्षति भएको प्रत्यक्षदर्शीले बताएका छन् ।
घाइते र मृतकमध्ये धेरै दुर्घटनाका बेला घटनास्थलमा रहेका मोटरसाइकल चालक, पैदल यात्री, सडकका व्यापारीलगायत रहेको पनि उनीहरूले जनाएका छन् ।
शनिबार बिहान किनबेचका लागि सयौँ मानिसको भिड सडकमा लागेका बेला दुर्घटना भएकाले धेरै मानवीय क्षति भएको जनाइएको छ । घाइतेमध्ये धेरैको अवस्था गम्भीर रहेकाले मृतकको सङ्ख्या अझै बढ्न सक्ने स्थानीय अधिकारीले अनुमान गरेका छन् । (रासस/सिन्ह्वा)
