जेनेभा । विश्व स्वास्थ्य सङ्गठनले स्वास्थ्यकर्मीलाई कोभिड–१९ विरुद्धको खोप सहज उपलब्ध गराउन विश्वका देशहरूसित आग्रह गरेको छ ।

विश्वमा स्वास्थ्यकर्मीहरू नै कोभिड सङ्क्रमणको मारमा परेका बताउँदै उनीहरूको सुरक्षाका लागि खोपको उपलब्धता आवश्यक रहेको बताइएको हो ।

विश्व स्वास्थ्य सङ्गठनले कोभिडले स्वास्थ्यकर्मीलाई नराम्ररी प्रभावित पारेको र त्यसबाट कम्तीमा पनि एक लाख १५ हजार जना स्वास्थ्यकर्मीको ज्यान गएको बताएको छ । विश्व स्वास्थ्य सङ्गठनले २०२० को जनवरीदेखि २०२१ को मे महिनाको बिचमा यति धेरै स्वास्थ्यकर्मीको ज्यान गएको अनुमान गरिएको बताएको छ ।

विश्व स्वास्थ्य सङ्गठनका महानिर्देशक डा. टेड्रोस आधनाम गेहब्रेयससले स्वास्थ्यकर्मीलाई कोभिड खोपका लागि प्राथमिकतामा राख्नुपर्ने बताउनुभएको हो । उहाँले अहिले पनि विश्वका करिब ११९ देशका स्वास्थ्यकर्मीको तथ्याङ्क हेर्दा ती देशका करिब पाँच स्वास्थ्यकर्मीमध्ये दुई जनाले मात्र खोपको पूर्ण मात्रा प्राप्त गरेका बताउनुभएको छ । उहाँले अहिले पनि विश्वमा कोभिड महामारीको अवस्था नहटेको र त्यसमा स्वास्थ्यकर्मीहरू पहिलो पङ्क्तिमा बसेर काम गर्नुपर्ने भएकाले उनीहरूलाई खोप उपलब्ध गराउनुपर्ने बताउनुभयो ।

अहिले विश्वमा खोपको न्यायपूर्ण वितरण हुन नसकेकोमा विश्व स्वास्थ्य सङ्गठनले पनि त्यसको आलोचना गर्ने गरेको छ । (रासस/सिन्ह्वा)